އުނގޫފާރު ރީޖަނަލް ހޮސްޕިޓަލްގައި ރާއްޖޭގެ ފުރަތަމަ ހިސްޓްރޮސްކޯޕިކް މަޔޯމެކްޓޮމީ ސާޖަރީކޮށްފި އެވެ.
އުނގޫފާރު ހޮސްޕިޓަލުން މައުލޫމާތު ދިން ގޮތުގައި އެ ޕްރޮސީޖާ ކުރިއަށް ގެންދިޔައީ ގައިނެކޮލޮޖިސްޓް ޑރ. ތަލްހާ އެވެ. އަދި އެކަން އެ ހޮސްޕިޓަލުން ސިފަކުރިނީ 'މިނިމަލީ އިންވޭސިވް ގައިނެކޮލޮޖިކަލް' ފަރުވާ ކުރިއެރުވުމުގައި ލިބުނު ބޮޑު ކުރިއެރުމެއްގެ ގޮތުގައި އެވެ.
މިއީ ރާއްޖޭގައި މިފަދަ ސާޖަރީއެއް ކުރި ފުރަތަމަ ފަހަރެވެ. އުނގޫފާރު ހޮސްޕިޓަލުން ބުނި ގޮތުގައި އެ ކާމިޔާބީއާއެކު އެ ހޮސްޕިޓަލުން ޒަމާނީ ހިސްޓްރޮސްކޯޕިކް ހިދުމަތްތައް ލިބޭނެ އެވެ. އެގޮތުން މި ހިދުމަތާއެކު ޕޮލިޕް އާއި ފައިބްރޮއިޑް އަދި ސެޕްޓަމް ނެގުމުގެ ހިދުމަތް ލިބޭނެ އެވެ. އަދި އިންފާޓިލިޓީ އެސެސްމެންޓް ހަދައިދިނުމުގެ ހިދުމަތް ވެސް އުނގޫފާރު ހޮސްޕިޓަލުން މިހާރު ލިބޭނެ ކަމަށް އެ ހޮސްޕިޓަލުން ބުންޏެވެ.
އޭގެ އިތުރުން އެ ޕްރޮސީޖާ ކުރިއަށް ގެންދާނީ ވަރަށް ކުޑަ ތަންކޮޅެއް ކަފާލައިގެން ކަމަށް އުނގޫފާރު ހޮސްޕިޓަލުން ވަނީ ހާމަކޮށްފައިވެ އެވެ. އެކަން އެގޮތަށް ކުރުމުގެ ސަބަބުން، ލަކުނު ބޭރުން ފެންނަން ނުހުންނާނެ ކަމަށާއި އަދި ބަލި މީހާގެ ރައްކާތެރިކަން އިތުރުވެ، ބަލިން ރަނގަޅުވުން އަވަސްވާނެ ކަމަށް އެ ހޮސްޕިޓަލުން ވަނީ ބުނެފަ އެވެ.
ހިސްޓްރޮސްކޯޕިކް މަޔޯމެކްޓޮމީ ސާޖަރީއަކީ ކުރިމަތިފަރާތުން ކެމެރާއެއް ލައްވައި، މިނިމަލީ އިންވޭސިވް ނުވަތަ ވަރަށް ކުޑަ ތަންކޮޅެއް ކަފާލައިގެން ޔޫޓެރަސް އިން ފައިބްރޮއިޑްސް ނެގުމަށް ހަދާ ސާޖަރީއެކެވެ.
