އައްޑޫ ސިޓީ ފޭދޫ ބަނދަރުގެ ބޭރުގައި އަޅާފައި އޮތް ޑައިވިން ދޯންޏެއްގައި ރޯވެއްޖެއެވެ.
މި ހާދިސާއާ ގުޅޭގޮތުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފައިވާ ގޮތުގައި، ފޭދޫ ބަނދަރު ބޭރުގައި އޮތް ދޯންޏެއްގައި އަލިފާން ރޯވެގެން އުޅޭކަމުގެ ރިޕޯޓް ލިބުމާއެކު، އެމްއެންޑީއެފް ސަދަން އޭރިއާ ކޮމާންޑްގެ ފަޔާ ފައިޓަރުން ދަނީ އެ ސަރަހައްދުގައި ހަރަކާތްތެރިވަމުންނެވެ. ސިފައިން މިހާރު އަންނަނީ އަލިފާންގަނޑު ކޮންޓްރޯލް ކުރުމުގެ މަސައްކަތް ކުރަމުންނެވެ.
ސޯޝަލް މީޑިއާގައި ދައުރުވާ މަންޒަރުތަކުން ފެންނަ ގޮތުގައި، އަލިފާންގަނޑު ވަނީ ދޯނީގެ ބޮޑު ބަޔަކަށް ފެތުރިފައެވެ. ދޯނީގައި އަލިފާން ރޯވި ވަގުތު، ދޯނީގައި ބަޔަކު ތިބިކަން މިހާތަނަށް ކަށަވަރުކުރެވިފައި ނުވެއެވެ. އަދި އުޅަނދުން ބޯކޮށް ކަޅުދުން އަރަމުންދާއިރު، މި ހާދިސާ އެއްވެސް މީހަކަށް އަނިޔާއެއްވެފައިވާކަން އަދި ރިޕޯޓުކޮށްފައެއް ނުވެއެވެ.
މި ހާދިސާ ހިނގަން މެދުވެރިވި ސަބަބު އަދި މިހާތަނަށް ދެނެގަނެވިފައި ނުވާއިރު، ސިފައިން އަންނަނީ އެ ސަރަހައްދުގައި މިހާރުވެސް ހަރަކާތްތެެރިވަމުންނެވެ.
