ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު ގިނަ އަދަދެއްގެ ސިނގިރޭޓް މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
މި ތަކެތި އަތުލައިގަނެފައިވަނީ މިދިޔަ ބުރާސްފަތި ދުވަހު މާލޭ ކޮމާޝަލް ހާބަރުންނެވެ.
ކަސްޓަމްސްއިން ހާމަކުރި ގޮތުގައި، މި އޮޕަރޭޝަނުގައި އަތުލައިގަނެފައިވަނީ ޖުމްލަ 99,000 ސިނގިރޭޓް ސްޓިކްސް އެވެ. މި ތަކެތި ރާއްޖެ އެތެރެކުރަން މަސައްކަތް ކޮށްފައިވަނީ ކަނޑުމަގުން ގެނައި މުދަލުގެ ތެރޭގައި ފޮރުވައިގެންނެވެ.
މިފަހަކަށް އައިސް ގަވާއިދާ ހިލާފަށް ރާއްޖެއަށް ސިނގިރޭޓް އެތެރެކުރާ މިންވަރު އިތުރުވެފައިވާކަން ފާހަގަކުރެވެއެވެ. އެގޮތުން، ވޭތުވެދިޔަ ދޮޅުމަސް ދުވަހުގެ ތެރޭގައި އެކަނިވެސް ގަވާއިދާ ހިލާފަށް އެތެރެކުރަން އުޅުނު 2 މިލިއަން ސިނގިރޭޓް ކަސްޓަމްސްއިން ވަނީ އަތުލައިގެންފައެވެ.
ސިނގިރޭޓާއި ދުންފަތުގެ ބާވަތްތައް ރާއްޖެ އެތެރެކުރުމުގައި އަމަލުކުރަންޖެހޭ އުސޫލުތަކާ ހިލާފަށް ތަކެތި އެތެރެކުރާ ފަރާތްތަކާމެދު ކަސްޓަމްސްއިން ދަނީ ހަރުކަށި ފިޔަވަޅުތަކެއް އަޅަމުންނެވެ.
މި މައްސަލައާ ގުޅިގެން އިތުރަށް ބަލަންޖެހޭ ކަންކަން ތަހުގީގު ކުރަމުންދާ ކަމަށް ކަސްޓަމްސް އިން ބުންޏެވެ.
