ލުބުނާނުގެ އެކި ސަރަހައްދުތަކަށް އިސްރާއީލުން ދެމުންދާ ވަރުގަދަ ވައިގެ ހަމަލާތަކުގައި ޝަހީދުވި މީހުންގެ އަދަދު 123 އަށް އަރައިފި ކަމަށް ލުބުނާނުގެ ހެލްތު މިނިސްޓްރީން ހާމަކޮށްފި އެވެ.
މި ހަފުތާގައި އިސްރާއީލުން ލުބުނާނުގެ ވެރިރަށް ބެއިރޫތާއި، ގައުމުގެ ދެކުނާއި އިރުމަތީ ސަރަހައްދުތަކަށް އަމާޒުކޮށް ދޭން ފެށި މި ހަމަލާތަކުގައި މިހާތަނަށް 683 އަށްވުރެ ގިނަ މީހުން ޒަހަމްވެފައިވާ ކަމަށް ބުރާސްފަތި ދުވަހު ނެރުނު ބަޔާނެއްގައި އެ މިނިސްޓްރީން ބުނެފައިވެ އެވެ.
އިސްރާއީލު ސިފައިން ބުނާ ގޮތުގައި އެމީހުން ވަނީ ބެއިރޫތުގެ އާބާދީ ބޯ ސަރަހައްދެއް ކަމަށްވާ ދާހިޔާއަށް އެކަނިވެސް 26 ފަހަރެއްގެ މަތިން ހަމަލާދީފަ އެވެ. މި ހަމަލާތަކުގައި ހިޒްބުﷲގެ މަރުކަޒުތަކާއި ޑްރޯން ގުދަންތަކަށް އަމާޒުކުރި ކަމަށް އިސްރާއީލުން ބުނި ނަމަވެސް، މި ހަމަލާތަކުގެ ސަބަބުން އާންމުންގެ އެތައް ބަޔަކު ވަނީ ހާލުގައި ޖެހިފަ އެވެ.
މި ހަމަލާތަކާ ގުޅިގެން ހިޒްބުﷲ އިން ވަނީ އިސްރާއީލުގެ އުތުރު ބޯޑަރާ 5 ކިލޯމީޓަރު ކައިރީގައި ދިރިއުޅޭ އިސްރާއީލު ރައްޔިތުން އެ ސަރަހައްދުތަކުން ދިއުމަށް އިންޒާރު ދީފަ އެވެ. ހިޒްބުﷲ އިން ބުނީ ލުބުނާނުގެ މިނިވަންކަމަށް އަރައިގަނެ، އާންމުން ދިރިއުޅޭ ތަންތަން ސުންނާފަތި ކުރަމުންދާ ދިއުމަށް ހިމޭނުން ނުތިބޭނެ ކަމަށެވެ.
އިސްރާއީލުގެ އިންޒާރުތަކާ ގުޅިގެން ބެއިރޫތުގެ ދާހިޔާ ސަރަހައްދުން ގާތްގަނޑަކަށް ބައި މިލިއަނެއްހާ މީހުން ވަނީ ގެދޮރު ދޫކޮށް ފިލާފަ އެވެ. މިކަމުގެ ސަބަބުން ލުބުނާނުގައި ބޮޑު އިންސާނީ ކާރިސާއެއް ވަނީ އުފެދިފަ އެވެ. އެތައް ސަތޭކަ އާއިލާއެއް ބެއިރޫތުގެ ގޮނޑުދޮށްތަކާއި މަގުމަތީގައި ހިޔާވަހިކަމެއް ނެތި ތިބި އިރު، ގިނަ ބަޔަކު ބުނަމުންދަނީ އެމީހުންނަކީ ޖަނަވާރުން ނޫން ކަމަށާއި، ފިނިގަދަވުމުގެ ސަބަބުން ކުޑަކުދިންނަށް ބޮޑެތި ތަކުލީފުތަކެއް އުފުލަން ޖެހިފައިވާ ކަމަށެވެ.
ލުބުނާނުގެ ސަރުކާރުން ބައެއް ސްކޫލްތަކުގައި ވަގުތީ ހިޔާވަހިކަން ގާއިމުކުރި ނަމަވެސް، ހާލުގައި ޖެހިފައިވާ މީހުންގެ އަދަދު ގިނަކަމުން އެކަށީގެންވާ ވަސީލަތްތައް ނެތް ކަމަށް ރިޕޯޓުތައް ބުނެ އެވެ. މި ހަމަލާތަކުގައި ގެއްލުން ލިބެމުންދާ މީހުންގެ ތެރޭގައި ލުބުނާނު ރައްޔިތުންގެ އިތުރުން އެ ގައުމުގައި ތިބި ސީރިއާ އަދި ފަލަސްތީނުގެ ރެފިއުޖީންވެސް ހިމެނެ އެވެ.
މި ހަނގުރާމައަކީ އިސްރާއީލާއި އީރާނާ ދެމެދު އޮތް ނުތަނަވަސްކަމުގެ ތެރެއިން، މިދިޔަ ހޯމަ ދުވަހުން ފެށިގެން އިތުރަށް ގޯސްވެފައިވާ ހަނގުރާމައެކެވެ. އިސްރާއީލުން ދަނީ ހުއްޓުމެއްނެތި ލުބުނާނުގެ އެކި ސަރަހައްދުތަކަށް ބޮން އަޅަމުންނެވެ.
