ދިވެހިރާއްޖޭގެ އިސްލާމީ އުސޫލުތަކާ ހިލާފަށް، މީސްމީޑިއާގެ ވަސީލަތެއް ކަމަށްވާ ޓިކްޓޮކް ބޭނުންކޮށްގެން ދީނަށް ފުރައްސާރަކޮށް ދޮގު މައުލޫމާތު ފަތުރަމުންދާ މީހަކު ހޯދުމުގެ މަސައްކަތް ފުލުހުން ފަށައިފި އެވެ.
ފުލުހުންގެ އިދާރާއިން ހާމަކުރައްވާފައިވާ ގޮތުގައި މި މައްސަލައާ ގުޅިގެން ހޯދަމުންދަނީ ނ. ކުޑަފަރި، މަނަދޫގެ، އުމުރުން 44 އަހަރުގެ ހުސައިން ޔޫސުފެވެ.
މި މީހާ ހޯދަމުންދަނީ ޓިކްޓޮކްގައި އެކި ކަހަލަ ވީޑިއޯތައް އާންމުކޮށް، އިސްލާމްދީނުގެ އަސާސްތަކަށް ބަދުބަސް ބުނެ، ދީނާ ގުޅޭގޮތުން ކަނޑައެޅިގެންދޮގު މައުލޫމާތު ފަތުރަމުންދާ ކަމުގެ ތުހުމަތުގަ އެވެ. ދިވެހިރާއްޖޭގެ ގާނޫނު އަސާސީ އާއި އިސްލާމީ ޝަރީޢަތާ ހިލާފަށް ހިންގާ މިފަދަ އަމަލުތަކަކީ މުޖުތަމައުގެ މަސްލަހަތު ގެއްލި، ފިތުނަ އުފެދޭނެ ކަންކަން ކަމަށްވާތީ ފުލުހުން ދަނީ މި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ.
ހުސައިން ޔޫސުފް އާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ، އެ މަޢުލޫމާތެއް ފުލުހުންނާ ހިއްސާކުރުމަށް ވަނީ އެދިފަ އެވެ. ދިވެހި ސަރުކާރާއި ކަމާބެހޭ މުއައްސަސާތަކުން އަބަދުވެސް ބާރުއަޅަމުންދަނީ އިސްލާމީ ދީނުގެ ހުރުމަތް ކެނޑޭފަދަ އެއްވެސް އަމަލަކަށް ދިވެހި ފަސްގަނޑުގައި ފުރުސުތު ނުދިނުމަށެވެ.
