ރަހުމަތުގެ މައްސަރު ވަކިވުމުގެ ވަގުތު ކުޑަތަންވަމުންދާއިރު، ރަމަޟާން މަހުގެ ފަހު ދިހައިގެ ރޭތަކުގެ ބޭނުން އެންމެ ފުރިހަމަ ގޮތުގައި ހިފުމަށް މިއަދުގެ ހުކުރު ހުތުބާގައި އިލްތިމާސް ކޮށްފިއެވެ.
ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ހުތުބާ ބިނާކޮށްފައި ވަނީ ރަމަޟާން މަހުގެ ފަހު ދިހައިގެ މާތްކަމުގެ މައްޗަށެވެ. ހުތުބާގައި ބުނެފައިވަނީ، ފާއިތުވި ދުވަސްތަކުގައި ކުރެވުނު ހެޔޮ އަމަލުތަކާ މެދު ވިސްނައި، އިތުރަށް ހެޔޮ އަމަލުތައް ކުރުމުގައި ދެމިތިބުމަށް ގަދައަޅައި މަސައްކަތް ކުރަންޖެހޭ ކަމަށެވެ. އަދި ތިމާގެ އަމިއްލަ ނަފުސަށް އެދޭ ހެޔޮ ކަންތައްތައް ތިމާގެ އަހުލުވެރިންނަށްވެސް އެދުމަކީ އިސްލާމްދީނުގައި ނުހަނު ބާރުއަޅުއްވާފައިވާ ކަމެއްކަން ހުތުބާގައި ހަނދާންކޮށްދީފައި ވެއެވެ.
އޭގެ އިތުރުން މިއަދުގެ ހުތުބާގައި ބުނެފައި ވަނީ ރަމަޟާން މަހަކީ އަޅުކަމުގެ މައްސަރުކަމަށް ވުމާއެކު، ރޭ އަޅުކަން ކުރުން ގިނަކުރުމަށެވެ. ފަހު ދިހައިގެ ރޭތަކަކީ މާތް اللهُ ގެ ރަހުމަތާއި، ފުއްސެވުމާއި، ރުއްސެވުން އަދި ނަރަކައިން މިންޖު ކުރެއްވުން އަޅުތަކުންނަށް ދެއްވާ ރޭތަކެއްކަން ހުތުބާގައި ފާހަގަކުރިއެވެ. އެހެންކަމުން، ސުވަރުގެ އެދޭ ކޮންމެ މީހަކު އެ ރޭތަކުގެ ދަރުމަ އާއި މާތްކަން ލިބިގަތުމަށް މަސައްކަތް ކުރުމަކީ ކޮންމެހެން ކުރަންޖެހޭ ކަމެއް ކަމަށް ބުނެފައިވެއެވެ.
ހަމައެހެންމެ ދީލަތި ކަމާއި ހޭދަކުރުމުގެ މި މައްސަރުގައި، ހާއްސަކޮށް ފަހު ދިހައިގެ ދުވަސްތަކުގައި ސަދަގަތްކުރުން އިތުރުކުރުމަށް ހުތުބާގައި ގޮވާލާފައިވެއެވެ. އެގޮތުން ކޮންމެ މުސްލިމެއްގެ މައްޗަށް ފަރުޟު ކުރައްވާފައިވާ ފިތުރު ޒަކާތް ނެރުމަށް ސަމާލުކަންދީ، އެކަމަށް އަވަސްވެގަތުމަށް ވެސް މިއަދުގެ ހުތުބާގައި ނަސޭހަތްތެރިވެފައިވެއެވެ.
އޭގެ އިތުރުން އިސްލާމީ އުންމަތުގެ ހާލަތާއި މެދު އިރުމަތީ ހިނގާ ހަނގުރާމައުގެ މައްޗަށް އަލިއަޅުވާލަމުން ހުތުބާގައި ބުނީ، މިއަދު އުންމަތް ހޭދަކުރަމުން ދަނީ ތާރީހުގައި ފާހަގަކޮށްލެވޭ ފަދަ ނުރައްކާތެރި ދުވަސްތަކެއް ކަމަށެވެ. އަދި އުންމަތުގެ މުސްތަގުބަލަށް ޓަކައި، އިސްލާމީ ހަޟާރަތް އަލުން އިއާދަކުރުމަށް ޓަކައި އަދުގެ ޒުވާން ޖީލު އިހުލާސްތެރި ކަމާއެކު އަޒުމް ކަނޑައަޅަން ޖެހޭ ކަމަށް ބުނެފައި ވެއެވެ. ރަމަޟާން މަހަކީ ނަސްރާއި ފަތަހައިގެ މައްސަރުކަން ހަނދާން ކޮށްދެމުން، އިސްލާމީ އުންމަތަށް ހެޔޮ ތައުފީގު ދެއްވުން އެދި މިއަދުގެ ހުތުބާގައި ދުއާ ކޮށްފައި ވެއެވެ.
