ރަމަޟާން މަހުގެ ފަހު 10 ދުވަހަކީ ސަރުކާރު ބަންދު ދުވަސްތަކެއްގެ ގޮތުގައި ރައީސް ޑރ. މުޙައްމަދު މުޢިއްޒު ކަނޑައަޅުއްވާފައިވީ ނަމަވެސް، އެ މުއްދަތުގައިވެސް ހިއުމަން ރައިޓްސް ކޮމިޝަން (އެޗްއާރުސީއެމް) ގެ ހިދުމަތްތައް މެދުނުކެނޑި ލިބޭނެ އިންތިޒާމު އެ ކޮމިޝަނުން ހަމަޖައްސައިފިއެވެ.
އެޗްއާރުސީއެމްއިން ހާމަކުރި ގޮތުގައި 9 މާރިޗު 2026 އިން 19 މާރިޗު 2026 އާ ހަމައަށް ހިމެނޭ ރަމަޟާން މަހުގެ ފަހު ދިހައެއްގެ ބަންދު ދުވަސްތަކުގައި، ކޮމިޝަނަށް ލިޔެކިޔުންތައް ހުށަހެޅުމާއި މައްސަލަ ހުށަހެޅުމުގެ ފުރުސަތު އާންމުންނަށް އޮންނާނެއެވެ. މިގޮތުން، އެކި ބާވަތުގެ ލިޔެކިޔުންތައް ހުށަހެޅުމަށް ބޭނުންކުރާނީ ކޮމިޝަނުގެ ރަސްމީ އީމެއިލް އެޑްރެސް [email protected] އެވެ.
ކޮމިޝަނުގެ އިންވެސްޓިގޭޝަން ޑިޕާޓްމަންޓަށް މައްސަލަ ހުށަހެޅުމަށާއި، މިހާރު ހުށަހެޅިފައިވާ މައްސަލަތަކާ ގުޅިގެން މައުލޫމާތު ސާފުކުރުމަށް ބޭނުންވާ ފަރާތްތަކަށް، އެ ކޮމިޝަނުގެ ހިލޭގުޅޭ ނަންބަރު 1424 އަށް ގުޅުއްވައިގެން ކުރިއަށް ގެންދެވޭނެއެވެ.
މީގެ އިތުރުން، ވިސްލްބްލޯވާ ޕްރޮޓެކްޝަން ޔުނިޓަށް މައްސަލަ ހުށަހެޅުމަށް ބޭނުންވާ ފަރާތްތަކަށް [email protected] އަށް އީމެއިލް މެދުވެރިކޮށް މައްސަލަ ހުށަހެޅޭނެއެވެ. އަދި އެ ޔުނިޓާ ގުޅޭ މައުލޫމާތު ސާފުކުރުމަށް ނުވަތަ މައްސަލަ ހުށަހެޅުމަށް ހިލޭގުޅޭ ނަންބަރު 1624 ބޭނުންކުރެއްވުމަށް ވެސް އެޗްއާރުސީއެމްއިން ވަނީ އިރުޝާދު ދީފައެވެ.
ސަރުކާރުން ރަމަޟާން މަހުގެ ފަހު ދިހައެއް ބަންދު ކުރަން ނިންމެވީ އަޅުކަމަށް ފުރުސަތު ދިނުމުގެ ގޮތުންނެވެ. ފަހު ދިހަ އާއި އީދު ބަންދަށްފަހު ދެން ސަރުކާރު ހުޅުވޭނީ 23 މާޗް 2026ގައެވެ.
