ދިވެހިރާއްޖޭގެ އެކި ކަންކޮޅުތަކުގައިވާ މިސްކިތްތައް މަރާމާތުކޮށް، އެ ތަންތަނުގެ ހާލަތު ރަނގަޅުކުރުމަށް އެހީތެރިވުމުގެ ގޮތުން އިސްލާމީ ކަންތައްތަކާ ބެހޭ ވުޒާރާއާއި އުރީދޫ މޯލްޑިވްސް ގުޅިގެން "އުރީދޫ މަސްޖިދުނާ" އިނީޝިއޭޓިވް ރަސްމީކޮށް އިފްތިތާޙުކޮށްފިއެވެ. އުރީދޫގެ އިޖުތިމާޢީ ޒިންމާ (ސީ.އެސް.އާރު) ގެ ދަށުން ކުރިއަށްގެންދާ މި ޚާއްޞަ ޕްރޮގްރާމް އިފްތިތާހުކޮށްފައިވަނީ ދެ ފަރާތް ގުޅިގެން ބޭއްވި ނޫސްވެރިންގެ ބައްދަލުވުމެއްގައެވެ.
މި އިނީޝިއޭޓިވްގެ މައިގަނޑު މަގްސަދަކީ ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން ރާއްޖޭގެ އެކި ރަށްރަށުގައިވާ ދީނީ ބިނާތަކާއި ވަސީލަތްތައް އިތުރަށް ހަރުދަނާކޮށް ތަރައްޤީކުރުމެވެ. މީގެއިތުރުން، މުޖުތަމައުގެ ދީނީ ބޭނުންތައް ފުއްދައިދިނުމަށާއި، އިސްލާމީ އުމްރާނީ ތަރައްޤީގައި ސަރުކާރާއި އަމިއްލަ ކުންފުނިތަކާ ދެމެދު އޮންނަ ގުޅުން ހަރުދަނާކޮށް ދެމެހެއްޓުމަކީވެސް މި ޕާޓްނާޝިޕްގެ މުހިންމު އަމާޒެކެވެ.
މި މަޝްރޫއުގެ ދަށުން ކޮންމެ އަހަރަކުވެސް ރާއްޖޭގެ އެކި ސަރަހައްދުތަކުން ފަސް މިސްކިތެއް މަރާމާތުކުރުމަށް އުރީދޫ މޯލްޑިވްސްއިން ވަނީ ކަނޑައަޅާފައެވެ. އަދި މި މަރާމާތުގެ އެންމެހައި މަސައްކަތްތައް ކޮންމެ އަހަރެއްގެވެސް ރަމަޟާން މަސް ފެށުމުގެ ކުރިން އެއްކޮށް ނިންމައި، އާންމުންނަށް ބޭނުންކުރެވޭނެ އިންތިޒާމު ހަމަޖެއްސުމަށް އަމާޒު ހިފާފައިވާ ކަމަށް އެ ކުންފުނިން ހާމަކުރެއެވެ.
Advertisement
މިއީ ރާއްޖޭގެ މިސްކިތްތައް ދެމެހެއްޓެނިވި ގޮތެއްގައި ބެލެހެއްޓުމަށާއި، އަޅުކަންކުރާ ފަރާތްތަކަށް ހިތްފަސޭހަ އަދި ފުރިހަމަ މާޙައުލެއް ގާއިމުކޮށްދިނުމަށްޓަކައި އެޅުނު މުހިންމު ފިޔަވަޅެކެވެ. މި މަސައްކަތުގެ ސަބަބުން ރަށްރަށުގެ މިސްކިތްތަކުގެ ފެންވަރު މަތިވެ، ކުރިއަށް އޮތް ރަމަޟާން މަހާ ދިމާކޮށް ރައްޔިތުންނަށް ބޮޑެތި ލުއިފަސޭހަތަކެއް ލިބިގެންދާނެއެވެ.
