ފ. އަތޮޅު ނިލަންދޫގައި އެއާޕޯޓެއް ތަރައްގީކުރުމަށްޓަކައި ބޭނުންވާ ބިން ހިއްކުމުގެ މަސައްކަތް ނިންމާލާފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފި އެވެ.
މި މަޝްރޫއުގެ ދަށުން ނިލަންދޫ އެއާޕޯޓު ތަރައްގީކުރުމަށްޓަކައި ޖުމްލަ 45.6 ހެކްޓަރުގެ ބިން ވަނީ ހިއްކާފަ އެވެ. މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އިން މި މަސައްކަތް އެމްޓީސީސީއާ ހަވާލުކޮށްފައިވަނީ 2024 ވަނަ އަހަރުގެ މާޗް މަހުގެ 27 ވަނަ ދުވަހު އެވެ.
Advertisement
ފަޅު ފުންކުރުމާއި ވެލި އެޅުމުގެ މަސައްކަތާއެކު މުޅި މަޝްރޫއުގެ ޖުމްލަ މަސައްކަތުގެ 74 އިންސައްތަ ވަނީ ނިމިފައެވެ. އަދި ބިން ހިއްކާ ސަރަހައްދު ހިމާޔަތްކުރުމަށްޓަކައި 2098 މީޓަރުގެ ސަރަހައްދެއްގައި ބޮޑު ހިލައިގެ ރިވެޓްމެންޓް ޖެހުމާއި، 1400 މީޓަރުގެ ސަރަހައްދެއްގައި ޖިއޯބޭގް ރިވެޓްމެންޓް ޖެހުމުގެ މަސައްކަތްވެސް މިހާރު ވަނީ ފެށިފަ އެވެ.
ނިލަންދޫ އެއާޕޯޓަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މި ދައުރުގެ ތެރޭގައި ތަރައްގީކުރުމަށް އިއުލާނުކުރައްވާފައިވާ 15 އެއާޕޯޓުގެ ތެރޭގައި ހިމެނޭ މުހިންމު އެއް މަޝްރޫ އެވެ. ރައީސުލްޖުމްހޫރިއްޔާ މިދިޔަ އަހަރު ނިލަންދުއަށް ކުރެއްވި ޒިޔާރަތުގައި ރަށުގެ ރައްޔިތުންނާ ބައްދަލުކުރައްވައި ވިދާޅުވެފައިވަނީ، ނިލަންދޫ އެއާޕޯޓް ތަރައްގީކުރާނީ ޕްރައިވެޓް ޖެޓް ޖެއްސޭ ފެންވަރަށް ކަމަށެވެ.
މި އެއާޕޯޓް ތަރައްގީކުރަނީ 1800 މީޓަރުގެ ދިގު ރަންވޭއަކާއެކުގަ އެވެ. ރައީސް ވިދާޅުވެފައިވާ ގޮތުގައި، މި އެއާޕޯޓް ވެގެންދާނީ ރާއްޖޭގައި މިހާރު ހުރި އެންމެ ޒަމާނީ އަދި ފެންވަރު ރަނގަޅު އެއާޕޯޓުތަކުގެ ތެރެއިން އެއް އެއާޕޯޓަށެވެ. މި މަޝްރޫއަކީ ފ. އަތޮޅުގެ ފަތުރުވެރިކަމާއި އިގްތިސާދަށް ބޮޑު ކުރިއެރުމެއް ލިބިގެންދާނެ މަޝްރޫއެކެވެ.
