ށ. މިލަންދޫގައި ތަރައްޤީކުރުމަށް ހަމަޖެހިފައިވާ އެއާޕޯޓަށް ބޭނުންވާ ބިން ހިއްކުމުގެ މަޝްރޫއު، ރެކޯޑު މުއްދަތެއްގެ ތެރޭގައި ކާމިޔާބުކަމާއެކު ނިންމާލައިފި އެވެ.
މި މަޝްރޫއުގެ ދަށުން ބިން ހިއްކުމުގެ މަސައްކަތް ރަސްމީކޮށް ފަށާފައިވަނީ 3 އޭޕްރީލް 2026 ގައެވެ. އަދި މުޅި މަޝްރޫއު އެއްކޮށް ނިންމާލާފައިވަނީ 4 މެއި 2026 ގެ ނިޔަލަށެވެ. އެއީ އެންމެ 31 ދުވަހުގެ ކުރު މުއްދަތެކެވެ.
Advertisement
މި މަޝްރޫއުގެ ތަފްސީލަށް ބަލާއިރު، އެއާޕޯޓަށް ބޭނުންވާ 21 ހެކްޓަރުގެ ބިން މިހާރު ވަނީ އެއްކޮށް ހިއްކާ ނިންމާފަ އެވެ. މި މަސައްކަތަށް ޖުމްލަ 1,134,534 ކިއުބިކް މީޓަރުގެ ވެލި ބޭނުންކޮށްފައިވެ އެވެ. މި ބޮޑު މަޝްރޫޢު ކުރު މުއްދަތެއްގައި ނިންމާލުމަށް ބޭނުންކޮށްފައިވަނީ ދުނިޔޭގެ އެންމެ ބޮޑު އެއް ޑްރެޖަރު ކަމަށްވާ "ކްއީން އޮފް ދަ ނެދަލޭންޑްސް" އެވެ. މި ޑްރެޖަރަކީ އެއްފަހަރާ 35,000 ކިއުބިކް މީޓަރުގެ ވެލި އުފުލުމުގެ ޤާބިލުކަން ލިބިފައިވާ އުޅަނދެކެވެ.
މިލަންދޫ އެއާޕޯޓު މަޝްރޫއުގެ ޖުމްލަ ސަރަހައްދަކީ 25.90 ހެކްޓަރެވެ. މީގެ ތެރޭގައި އަލަށް ހިއްކި 21 ހެކްޓަރުގެ އިތުރުން، ރަށުގެ މިހާރު އޮތް ބިމުން ގަސްތައް ނަގައި ސާފުކުރި 4.9 ހެކްޓަރުގެ ސަރަހައްދު ހިމެނެ އެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ ތަރައްގީގެ މަޝްރޫއުތައް ބާރުމިނުގައި ކުރިއަށްގެންދާއިރު، މިއީ މިފަދަ ކުރު މުއްދަތެއްގައި ބޮޑު ބިމެއް ހިއްކާ ނިންމި ދެވަނަ މަޝްރޫއެވެ. މީގެ ކުރިން ތ. ގާދިއްފުށީގެ ބިން ވެސް ވަނީ އެންމެ 10 ދުވަސްތެރޭ ހިއްކައި، އެ ރަށް އޮތް ވަރަށްވުރެ ދެގުނަ ބޮޑުކޮށްފަ އެވެ.
މިލަންދޫގައި އެއާޕޯޓެއް ތަރައްގީކުރުމަކީ އެ އަތޮޅުގެ ރައްޔިތުންނަށް ދަތުރުފަތުރުގެ ދާއިރާއިންނާއި އިގްތިސާދީ ގޮތުން ބޮޑެތި ކުރިއެރުންތަކެއް ލިބިގެންދާނެ ކަމެކެވެ.
