ސަރުކާރުން އަލަށް ފެށުމަށް ނިންމާފައިވާ ޓެކްސީ ލައިންގެ ހިދުމަތް ކުރިއަށް އޮތް ފިތުރު އީދު ދުވަހު ފެށުމަށް މަސައްކަތް ކުރަމުންދާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެއެވެ.
މިނިސްޓަރު މިކަން ހާމަކުރެއްވީ އެ މިނިސްޓްރީގެ މަސައްކަތްތަކުގެ ތަފްސީލު ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
މިނިސްޓަރު އަމީން ވިދާޅުވީ ޓެކްސީ ލައިންގެ ހިދުމަތް ފެށުން ލަސްވެގެން ދިޔައީ ޓެކްސީތަކަށް ބައެއް ބަދަލުތައް ގެންނަން ޖެހުމާ ގުޅިގެން ކަމަށެވެ. މިއީ ރާއްޖޭގައި މި ހިދުމަތް ދޭން ޖެހެނީ މޫދާއި ވަރަށް ކައިރީގައި ކަމަށްވާތީ، އުޅަނދުތަކުގެ ދިގު މުއްދަތަށް ބަލައި ގެންނަން ޖެހުނު މުހިންމު ބަދަލުތަކެއް ކަމަށް މިނިސްޓަރު ފާހަގަކުރެއްވިއެވެ.
މި ހިދުމަތުގައި ތިން މޮޑެލެއްގެ ކާރު ބޭނުންކުރުމަށް ވަނީ ނިންމާފައެވެ. އޭގެ ތެރެއިން އެއް މޮޑެލެއްގެ ކާރުތައް ތައިލެންޑުން ގެންނައިރު، އަނެއް ދެ މޮޑެލްގެ ކާރުތައް ގެންނަނީ ޗައިނާއިންނެވެ. މިނިސްޓަރު ވިދާޅުވި ގޮތުގައި މި ކާރުތައް ރާއްޖެ ގެންނާނީ ދެ ބެޗަކަށް ބަހާލައިގެންނެވެ.
ކާރުތައް ގެނައުމުގެ ތާވަލާ ގުޅޭގޮތުން މިނިސްޓަރު ވިދާޅުވީ ފުރަތަމަ ބެޗުގެ ކާރުތައް މިއަދު ލަންކާ ޕޯޓަށް ވަންނާނެ ކަމަށާއި، އެމްޓީސީސީން މައުލޫމާތު ދީފައިވާ ގޮތުގައި މި މަހުގެ 11 ވަނަ ދުވަހު އެ ކާރުތައް ރާއްޖެ ގެނެވޭނެ ކަމަށެވެ. އަދި ދެވަނަ ބެޗުގެ ކާރުތައް ގެނެވޭނެ ތާރީހެއް އަންނަ ހުކުރު ދުވަހު ޔަގީންކުރެވޭނެ ކަމަށްވެސް ވިދާޅުވިއެވެ.
ސަރުކާރުގެ އަމާޒަކީ މި މަހުގެ 18 ވަނަ ދުވަހު ހިދުމަތް އިފްތިތާހުކޮށް، ލިމިޓެޑް ހިދުމަތްތަކެއް ފެށުމެވެ. ނަމަވެސް އެމްޓީސީސީގެ މައިގަނޑު އަމާޒަކީ އީދު ދުވަހަށް މުޅި ހިދުމަތް ފުރިހަމައަށް ފެށުން ކަމަށް މިނިސްޓަރު ވިދާޅުވިއެވެ.
"އަޅުގަނޑުމެން މި ބަލަނީ މިހާރު މިއޮތް ތާވަލާއި އެއްގޮތަށް މިކަން ކުރެވޭތޯ،" މިނިސްޓަރު ވިދާޅުވިއެވެ.
ސަރުކާރުން ރާވާފައިވަނީ ފުރަތަމަ ބުރުގައި ޖުމްލަ 150 ކާރު ބޭނުންކޮށްގެން ޓެކްސީގެ ހިދުމަތް ދިނުމަށެވެ. މި ހިދުމަތް ފެށުމުން މާލެ ސަރަހައްދުގެ ދަތުރުފަތުރުގެ ނިޒާމަށް ބޮޑު ލުޔެއް ލިބިގެންދާނެ ކަމަށް ބެލެވެއެވެ.
