ހއ. ދިއްދޫ ފުޓްބޯޅަ ދަނޑު ތަރައްގީކުރުމުގެ މަޝްރޫއު ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ރަސްމީކޮށް ހަވާލުކޮށްފިއެވެ.
މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގައި އިއްޔެ ބޭއްވި ހާއްސަ ރަސްމިއްޔާތެއްގައި، މި މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު މުހައްމަދު ފަޔާޒެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ޖަމްޝީދެވެ.
މި މަޝްރޫއުގެ ދަށުން ކުރިއަށްގެންދަން ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި ފުޓްބޯޅަ ދަނޑުގެ ސަބްބޭސް ތައްޔާރުކުރުމާއި، ޓަރފް އަޅައި ޕިޗު ތައްޔާރުކުރުމާއި، ބައުންޑަރީ ފާރު ރޭނުމާއި، ފެންސް ޖެހުމުގެ އިތުރުން ލައިޓިން ސިސްޓަމް ގާއިމުކުރުމާއި ރޮސްޓްރަމް އިމާރާތްކުރުން ހިމެނެއެވެ.
ޖުމްލަ 28.50 މިލިއަން ރުފިޔާގެ މި މަޝްރޫއަކީ 360 ދުވަހުގެ ތެރޭގައި ނިންމުމަށް އެމްޓީސީސީއާ ހަވާލުކުރެވިފައިވާ މަސައްކަތެކެވެ.
ހއ. އަތޮޅުގެ ވެރިކަން ކުރާ ރަށް ކަމަށްވާ ދިއްދޫއަކީ 4,186 މީހުންގެ އާބާދީއެއް އޮންނަ ރަށެކެވެ.
މި މަޝްރޫއު ނިމި ބޭނުންކުރަން ފެށުމުން، އެ ރަށުގެ ރައްޔިތުންނަށް ދުޅަހެޔޮ ސިއްހަތެއްގައި ދެމިތިބުމަށާއި އިޖުތިމާއީ ގުޅުން ބަދަހިކުރުމަށް ގިނަގުނަ ފުރުސަތުތަކެއް ފަހިވެ، ކުޅިވަރުގެ ދާއިރާއިން ބޮޑެތި ކުރިއެރުންތަކެއް ލިބިގެންދާނެއެވެ.
