އީރާނުގެ އައު ސްޕްރީމް ލީޑަރަކަށް ކުރީގެ ސްޕްރީމް ލީޑަރު އާޔަތުالله ޢަލީ ޚާމަނާއީގެ ދަރިކަލުން މުޖްތަބާ ޚާމަނާއީ އިންތިޚާބުކޮށްފިއެވެ.
މީގެ ކުރިން އިޒުރޭލުގެ މީޑިއާތަކުން ވަނީ އަށްޑިހަ އަށް މެންބަރުންގެ އެސެމްބްލީ އޮފް އެކްސްޕާޓްސް އިން އައު ސުޕްރީމް ލީޑަރު އޮންލައިންކޮށް އިންތިޚާބު ކުރަމުންދާ ކަމަށާއި އެ ކަންތައް އެންމެ ފަހު މަރުހަލާއާ ހަމައަށް ގޮސްފައިވާކަމަށް ބުނެފަ އެވެ.
އެމެރިކާއާއި އިޒުރޭލުގެ ހަމަލާތަކުގައި ޤުމްގައި ހުރި އެސެމްބްލީ އޮފް އެކްސްޕާރޓްސްގެ އިމާރާތް ހަލާކުވި ނަމަވެސް، އެ އިމާރާތް ކުރިން ހުސްކޮށްފައިވާތީ އެތަނަށް ދިން ހަމަލާގައި އެއްވެސް މީހަކަށް ގެއްލުމެއް ނުލިބެއެވެ.
ފެބްރުއަރީ މަހުގެ 28 ވަނަ ދުވަހު އިޒުރޭލާއި އެމެރިކާއިން ގުޅިގެން ދިން ވައިގެ ހަމަލާތަކެއްގައި ދެމިއޮތުމުގެ ޢާލަމަށް ދަތުރުކުރެއްވި، އީރާނުގެ ސުޕްރީމް ލީޑަރު އާޔަތުالله ޚާމަނާއީގެ ޖަނާޒާ އޮންނާނީ ތެހެރާނުގައި ބާއްވާ ތައުޒިޔާގެ ބޮޑު ޖަލްސާއަކަށް ފަހު މަޝްހާދުގައެވެ.
އީރާނުގެ ނިއުސް އެޖެންސީން ބުނި ގޮތުގައި އާޔަތުالله ޢަލީ ޚާމަނާއީގެ ޖަނާޒާ އޮންނާނީ ތެހެރާނުގައި އިމާމް ޚުމޭނީ ހޯލުގައެވެ. މަޝްހަދުގައި ސުޕްރީމް ލީޑަރު ފަސްދާނުލާނެ ތާރީހެއް އަދި ކަނޑައެޅިފައެއް ނުވެއެވެ.
މުޖްތަބާ ޚާމަނާއީ އަކީ ކުރީގެ ސުޕްރީމް ލީޑަރުގެ ދެވަނަ ދަރިކަލުންނެވެ. އޭނާ މަޝްހޫރު ވެފައިވަނީ މަންޒަރުގެ ފަހަތުން ނުފޫޒު ފޯރުއްވަވާ ވަރުގަދަ ބޭފުޅެއްގެ ގޮތުގައެވެ. އޭނާ އަކީ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)އާ ގާތް ގުޅުމެއް އޮންނަ ބޭފުޅެއް ކަމަށް ބުނެވެއެވެ.
މުޖްތަބާ ޚާމަނާއީ ސަރުކާރުގެ މަތީ މަގާމެއް ކުރިން ފުރުއްވާފައެއް ނުވެއެވެ.
