ސަރުކާރުން އަޅަމުންދާ އިގްތިސާދީ ހަރުދަނާ ފިޔަވަޅުތަކާއެކު، މިއަހަރުގެ ފުރަތަމަ ދެ މަސްދުވަހުގެ ތެރޭގައި ދައުލަތުގެ މާލީ ހާލަތަށް ބޮޑު ކުރިއެރުމެއް ލިބި، ބޭރު ފައިސާގެ އާމްދަނީގެ ގޮތުގައި 222.8 މިލިއަން އެމެރިކާ ޑޮލަރު ލިބިފައިވާކަން ހާމަވެއްޖެ އެވެ.
މިނިސްޓްރީ އޮފް ފައިނޭންސްއިން އާންމުކޮށްފައިވާ 2026 ވަނަ އަހަރުގެ 8 ވަނަ ހަފުތާގެ މާލީ ރިޕޯޓުގައިވާ ގޮތުން، 1 ޖެނުއަރީ 2026 އިން 26 ފެބްރުއަރީ 2026 ގެ ނިޔަލަށް ދައުލަތަށް އާމްދަނީއާއި ހިލޭ އެހީގެ ގޮތުގައި ޖުމްލަ 7.8 ބިލިއަން ރުފިޔާ ލިބިފައިވެއެވެ. މި މުއްދަތުގެ ތެރޭގައި ދައުލަތުން ޚަރަދުކޮށްފައިވަނީ 5.9 ބިލިއަން ރުފިޔާއެވެ. އެހެންކަމުން، މި މުއްދަތުގެ ނިޔަލަށް ދައުލަތުގެ ބަޖެޓުން 1.9 ބިލިއަން ރުފިޔާގެ ރެކޯޑު ސާޕްލަސްއެއް ވަނީ ހާސިލުކުރެވިފަ އެވެ.
މިއީ މިދިޔަ 2025 ވަނަ އަހަރުގެ މި މުއްދަތާ އަޅާބަލާއިރު އާމްދަނީގެ ގޮތުން 29.3 އިންސައްތައިގެ ބޮޑު ކުރިއެރުމެކެވެ. މިދިޔަ އަހަރު މި މުއްދަތުގައި ލިބިފައިވަނީ 6.0 ބިލިއަން ރުފިޔާއެވެ. ދައުލަތަށް ލިބުނު އާމްދަނީގެ 83 އިންސައްތައަކީ ޓެކުހުގެ ގޮތުގައި ލިބުނު ފައިސާ އެވެ.
ޓެކްސް އާމްދަނީއަށް ބަލާއިރު، ފެބްރުއަރީ 26 ގެ ނިޔަލަށް 6.5 ބިލިއަން ރުފިޔާ ލިބިފައިވެއެވެ. މީގެ ތެރެއިން އެންމެ ބޮޑު ކުރިއެރުމެއް ފާހަގަކުރެވެނީ ފަތުރުވެރިކަމުގެ ދާއިރާއިން ނަގާ ޓީ.ޖީ.އެސް.ޓީ އަށެވެ. ޓީ.ޖީ.އެސް.ޓީގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 39.4 އިންސައްތަ އިތުރު އަދަދެކެވެ. މީގެ އިތުރުން ޖުމްލަ ޖީ.އެސް.ޓީގެ ގޮތުގައި 3.2 ބިލިއަން ރުފިޔާ އަދި ވިޔަފާރި އާއި މުދަލުން ނަގާ ޓެކުހުގެ ގޮތުގައި 2.2 ބިލިއަން ރުފިޔާ ވަނީ ލިބިފަ އެވެ.
ދައުލަތުގެ ޖުމްލަ ހަރަދުތައް އެއްވަރެއްގައި ހިފެހެއްޓިފައިވީ ނަމަވެސް، މުވައްޒަފުންގެ މުސާރައާއި އިނާޔަތްތަކަށް ކުރި ޚަރަދު ވަނީ 9.6 އިންސައްތަ އިތުރުވެފައެވެ. މިއީ ސަރުކާރުގެ ޕޭ ހާމަނައިޒޭޝަން ސިޔާސަތުގެ ދަށުން މުސާރައަށް ގެނައި ބަދަލުތަކާ ގުޅިގެން މުސާރައާއި ޕެންޝަނަށް ކުރި 2.64 ބިލިއަން ރުފިޔާގެ ހަރަދެވެ.
މާލީ ރިޕޯޓުން ދައްކާގޮތުގައި، ސޮވެރިން ޑިވެލޮޕްމަންޓް ފަންޑަށް (އެސް.ޑީ.އެފް) ޖަމާކުރި އަދަދުވެސް ވަނީ 287.1 މިލިއަން ރުފިޔާއަށް އިތުރުވެފައެވެ. މިއީ މިދިޔަ އަހަރާ އަޅާބަލާއިރު 2.5 އިންސައްތައިގެ އިތުރުވުމެކެވެ.
މިއަހަރުގެ "ވީކްލީ ފިސްކަލް ޑިވެލޮޕްމަންޓްސް" ރިޕޯޓު ޝާއިއުކުރުން ލަސްވެފައިވަނީ ދައުލަތުގެ އެކައުންޓިން ނިޒާމަށް ގެނެވުނު މުހިންމު ބަދަލުތަކެއްގެ ސަބަބުން ކަމަށް ފިނޭންސް މިނިސްޓްރީން މައުލޫމާތުދެ އެވެ. އޭގެ ތެރޭގައި ޝަރުއީ ދާއިރާއަށް "ސެކްޓޯރަލް ގްރާންޓް" ނިޒާމު ތައާރަފުކުރުމާއި، ޒަކާތު ފަންޑަށް ވަކި ލެޖަރ އެކައުންޓެއް ގާއިމުކުރުމުގެ މަސައްކަތް ހިމެނެއެވެ. މި އިސްލާހުތަކާއެކު އެކައުންޓިން ސިސްޓަމް އަލުން ތަރުތީބުކުރުމުގެ މަސައްކަތް މިހާރު ވަނީ ނިމުމަކަށް އައިސްފަ އެވެ.
