އައްޑޫ ސިޓީގައި މަސްތުވާތަކެތީގެ ވިޔަފާރި ފުޅާދާއިރާއެއްގައި ކުރާ ކަމަށް ފުލުހުން ތުހުމަތުކުރި އަލީ ނަދީމް (މައިލޯ ނަދަމާ) އާއި އިތުރު ހަ މީހަކު، ދައުވާ ކުރެވޭ މިންވަރަށް ހެކި ނެތިގެން ބަންދުން ދޫކޮށްލަން ޕްރޮސެކިއުޓާ ޖެނެރަލް (ޕީޖީ) އޮފީހުން ލަފާދީފިއެވެ.
މި މީހުންނަކީ މި ސަރުކާރުން ހިންގި "އޮޕަރޭޝަން އަލިމަގު" ގެ ދަށުން މިދިޔަ ޑިސެމްބަރު މަހުގެ ހަތަރުވަނަ ދުވަހު ހައްޔަރުކުރި ބައެކެވެ.
ޕީޖީ އޮފީހުން ހާމަކުރި ގޮތުގައި، މި މީހުންގެ މައްޗަށް ކުރެވުނު މައިގަނޑު ދެ ތުހުމަތަކީ ކުށް ކުރާ ޖަމާއަތެއްގައި ބައިވެރިވުމާއި މަނީ ލޯންޑްރިންގެ ތުހުމަތެވެ. ނަމަވެސް، ގާނޫނުގައި ތަހުގީގު ފުރިހަމަކުރުމަށް ކަނޑައެޅިފައިވާ އެންމެ ދިގު މުއްދަތު އިއްޔެއަށް ހަމަވިއިރު، އެ މީހުންގެ މައްޗަށް ކުށް ސާބިތުކުރެވޭ މިންވަރަށް ހެކި ގަރީނާ ލިބިފައި ނުވާ ކަމަށް އެ އޮފީހުން ރޭ ވަނީ ބުނެފައެވެ.
Advertisement
މި މައްސަލައިގައި ދޫކޮށްލަން ނިންމި މީހުންގެ ތެރޭގައި ހިމެނެނީ:
- އަލީ ނަދީމް، ކޮންމުލި / ސ. ހިތަދޫ
- އިބްރާހީމް ސިރާޖް، ވެޔޮފެހެބުރުގެ / ސ. ހިތަދޫ
- ހަސަން އަލްފާފު، ދޮރުފޮތިމާގެ / ސ. ހިތަދޫ
- އަމީން މުހައްމަދު، ކެކުރިމާގެ / ސ. ހިތަދޫ
- ސަލާމް ސައީދު، ލޮބްސްޓަމް / ސ. ހިތަދޫ
- ހާފިޘް ފައުޒީ / ފަލާހް، ސ. ހިތަދޫ
- ޒަހްނާ އަހްމަދު، އަންބަރީގެ / ދ. ހުޅުދެލި
ޕީޖީ އޮފީހުން ފާހަގަކުރި ގޮތުގައި ތަހުގީގުގެ މުއްދަތު އެކި ފަހަރު މަތިން އިތުރުކޮށްދިން ނަމަވެސް، އެކަށީގެންވާ ވަރަށް ތަހުގީގު ފުރިހަމަކުރެވިފައެއް ނުވެއެވެ.
ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ ގޮތުން، ކަނޑައެޅިފައިވާ މުއްދަތުގެ ތެރޭގައި ދައުވާކުރެވޭ މިންވަރަށް ހެކި ނުލިބިއްޖެނަމަ، ތަހުގީގީ އިދާރާއިން އެ މީހަކު ބަންދުން ދޫކޮށްލަން ޖެހެއެވެ. އެހެންކަމުން، ބަންދުގައި ތިބި މީހުން ދޫކޮށްލުމަށް ފުލުހުންނަށް މިހާރު ވަނީ ލަފާދީފައެވެ. ނަމަވެސް، އައު ހެކި ލިބިއްޖެ ހާލަތެއްގައި އަލުން ދައުވާކުރުމަށް ހުށަހެޅުމުގެ ފުރުސަތު އޮންނާނެ ކަމަށް ޕީޖީ އޮފީހުން ވަނީ ބުނެފައެވެ.
މި މައްސަލައިގައި ހިމެނޭ އަލީ ނަދީމަކީ އައްޑޫގައި ހަރަކާތްތެރިވާ "މައިލޯ" ގްރޫޕުގެ އިސް މީހެއްގެ ގޮތުގައި ފުލުހުން ތުހުމަތުކުރާ ފަރާތެކެވެ. އޭނާގެ ބަންދުގެ މައްސަލަ މީގެ ކުރިން ހައިކޯޓަށް ހުށަހެޅުމުން، އެ ކޯޓުން މިދިޔަ މަހު ނިންމާފައިވަނީ އޭނާ ބަންދުގައި ބެހެއްޓީ ރަނގަޅަށް ކަމަށެވެ. އެހެންނަމަވެސް، ތަހުގީގު މުއްދަތު ހަމަވިއިރު ދައުވާ ކުރެވޭ ވަރަށް ހެކި ނެތުމުން މިހާރު ވަނީ މި އެންމެން ދޫކޮށްލަން ޖެހިފައެވެ.
