މާލެ ސަރަހައްދުގައި ކުރިއަށްދާ އުމްރާނީ ތަރައްގީގެ އެންމެ ބޮޑު މަޝްރޫއު ކަމަށްވާ ތިލަމާލެ ބްރިޖް މަޝްރޫއުގެ 70 އިންސައްތަ މަސައްކަތް މިހާރު ނިމިފައިވާކަން ހާމަކޮށްފިއެވެ.
ޖުމްލަ 6.7 ކިލޯމީޓަރުގެ ދިގު މި ކަނެކްޓިވިޓީ ލިންކުން މާލެ، ވިލިމާލެ، ގުޅިފަޅު އަދި ތިލަފުށި ގުޅާލާއިރު، ރަށްތަކުގެ މަތިން މި ލިންކް ހުރަސްކުރާނީ ކޯޒްވޭތަކަކުންނެވެ. އެގޮތުން ވިލިމާލެ އާއި ގުޅިފަޅުގައި ކޯޒްވޭ ހެދުމުގެ މަސައްކަތް މިހާރު ކުރިއަށްދާއިރު، ގުޅިފަޅުގައި ކުރިއަށްދަނީ ތާރު އެޅުމުގެ ކުރިން ކުރަންޖެހޭ ސަބް ބޭސްގެ މަސައްކަތެވެ. އަދި ތިލަފުށީގައި ބްރިޖާ ގުޅޭ ސަރަޙައްދުގެ ގޮނޑުދޮށް ހިމާޔަތްކުރުމުގެ މަސައްކަތްތަކެއް އަންނަނީ ކުރަމުންނެވެ.
މި މަޝްރޫއުގެ ދަށުން މިހާރު ކުރިއަށްދާނީ ބްރިޖްގެ ޑެކަށް ބޭނުންވާ ސެގްމަންޓްތައް ކާސްޓްކުރުމާއި، ތަނބުތައް ގުޅާލުމަށް ޓަކައި އެ ސެގްމަންޓްތައް އިންސްޓޯލްކުރުމުގެ މަސައްކަތެވެ.
ބްރިޖް ޑެކަށް ބޭނުންވާ ޖުމްލަ 1222 ސެގްމަންޓްގެ ތެރެއިން 80 އިންސައްތަ ސެގްމަންޓް ކާސްޓްކޮށް މިހާރު ވަނީ ނިމިފައެވެ. އަދި ބްރިޖްގެ ތަނބުތައް ގުޅާލުމުގެ މަސައްކަތުގެ ބޮޑުބައި ވެސް ވަނީ ނިމިފައެވެ.
ޖުމްލަ 500 މިލިޔަން ޑޮލަރު ހަރަދުވާ މި ބިޔަ މަޝްރޫއު ކުރިއަށް ގެންދަނީ އިންޑިއާ ސަރުކާރުގެ 100 މިލިޔަން ޑޮލަރުގެ ގްރާންޓާއި 400 މިލިޔަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. ސަރުކާރުން އަންދާޒާކުރާ ގޮތުގައި މުޅި މަޝްރޫއުގެ މަސައްކަތް 2027 ވަނަ އަހަރުގެ ނިޔަލަށް އެއްކޮށް ނިންމާލެވޭނެއެވެ.
