ރަމަޟާން މަހު ރޯދައަށް ހުރުމަކީ އާންމުކޮށް ކައިބޮއި އުޅޭ ގޮތަށް ބޮޑު ބަދަލެއް އަންނަ ކަމެކެވެ. ގިނަ ވަގުތުތަކެއް ވަންދެން ނުކައި ހުރުމަށްފަހު ރޯދަވީއްލާ ގަޑީގައި ބަރު ކާނާ ކެއުމުން، ބަނޑު ފިއްތާ ގޭސް އުފެދުން ފަދަ އުނދަގޫތަކާ ކުރިމަތިލާން ޖެހިދާނެއެވެ. ނަމަވެސް، ކެއުމުގައި ބައެއް ކަންކަމަށް ސަމާލުކަން ދީގެން މި އުނދަގޫތަކުން ދުރުވެ، އަރާމުގައި ރޯދަ ހިފިދާނެއެވެ.

ރަމަޟާން މަހު ބަނޑުގައި ގޭސް އުފެދުމުން ރައްކާތެރިވުމަށް:

1. ރޯދަވީއްލާއިރު ލުއިކޮށް ފެށުން: ސުންނަތާ އެއްގޮތަށް ރޯދަވީއްލާއިރު ކުދުރު, ކުރުނބާ ނުވަތަ ފެނާއެކު ބޭނުންކުރާށެވެ. މިއީ ބަނޑަށް ލުއި އަދި ބަރު ކާނާ ކެއުމުގެ ކުރިން ހަޖަމުކުރުމުގެ ނިޒާމު ތައްޔާރުކޮށްދޭ ކަމެކެވެ.

2. ފަސޭހައިން ހަޖަމުވާ ކާނާ އިހްތިޔާރުކުރުން: ބަނޑަށް ލުއި، ސާދާ ކާނާތައް ބޭނުންކުރުން މުހިންމެވެ. މިސާލަކަށް:

1. ތަރުކާރީ ސޫޕް
2. އޯޓްސް
3. ފެނުކެއްކި ބަތް
4. ފިހުނު ކުކުޅު ނުވަތަ މަސް
5. މަޑުގިނީގައި ކެއްކި ތަރުކާރީ

މިއީ ރޯދަވީއްލާ ގަޑީގައި އާންމުކޮށް ބޭނުންކުރާ ތެޔޮ ގިނަ ކާނާތަކަށްވުރެ ބަނޑަށް ފަސޭހަ ތަކެއްޗެވެ.

3. ޕްރޮބަޔޮޓިކްސް ބޭނުންކުރުން: ޔޯގަޓާއި ލަބަން އަކީ ހަޖަމުކުރުމަށް އެހީތެރިވެދޭ ރަނގަޅު ބެކްޓީރިއާ އެކުލެވޭ އެއްޗިއްސެވެ. ހާރު ގަޑީގައި ނުވަތަ ރޯދަވީއްލުމަށްފަހު ޔޯގަޓް ބޭނުންކުރުމަކީ ބަނޑު ފިއްތުމުން ދުރުކޮށްދޭނެ ކަމެކެވެ.

4. ގޭސް ނޫފެދޭ މޭވާ ބޭނުންކުރުން: ދޮންކެޔޮ، ފަޅޯ، ކަރާ އަދި އޮރެންޖަކީ އާންމުކޮށް ބަނޑަށް ލުއި މޭވާތަކެކެވެ. ޚާއްޞަކޮށް ފަޅޯ ބޭނުންކުރުމުން ހަޖަމުކުރުމަށް ވަރަށް ބޮޑަށް އެހީތެރިވެދެއެވެ.

5. ފެން ބުއިން(ލަސްލަހުން): ރޯދަވީއްލުމާއި ހާރާ ދެމެދު ގިނައިން ފެން ބޯންވާނެއެވެ. ނަމަވެސް އެއްފަހަރާ މާގިނަ ފެން ބުއިމުގެ ބަދަލުގައި ލަސްލަހުން ބޯށެވެ. މިއީ ބަނޑުގެ ތެރެއަށް ވައި ވަނުމުން ރައްކާތެރިކޮށްދޭނެ ކަމެކެވެ.

މަދުކުރަންޖެހޭ ކާނާ:

1. ތެލުލި ތަކެތި (ބަޖިޔާ، ބޯކިބާ ފަދަ ތަކެތި)
2. ގޭސް ހުންނަ ބުއިންތައް (ސޮފްޓް ޑްރިންކްސް)
3. މާ ގިނައިން މުގު ނުވަތަ ތޮޅީގެ ބާވަތްތައް ކެއުން
4. ކެފޭއިން (ސައި ނުވަތަ ކޮފީ) މާގިނައިން ބުއިން

ގިނަ އިރު ރޯދައަށް ހުރުމަށްފަހު މާ އަވަސްއަރުވާލައިގެން ކެއުމަކީވެސް ގޭސް އުފެދޭ ކަމެކެވެ. އެހެންކަމުން ކާނާ ރަނގަޅަށް ހަފާލައިގެން މަޑުމަޑުން ކެއުމަށް ސަމާލުކަން ދޭށެވެ.

ރަމަޟާން މަހަކީ ރޫޙާނީ ކަންކަމަށް އިސްކަންދޭ މަހެކެވެ. ބަނޑުގެ އުނދަގޫތަކާހުރެ އަޅުކަމަށް ހުރަސް އެޅުނަ ނުދޭށެވެ. ކެއުމުގައި މެދުމިނުގެ، ލުއި އަދި ޞިއްޙަތަށް ފައިދާހުރި ބާވަތްތައް ބޭނުންކުރުމުން، މުޅި މަސް ދުވަހު ހަށިގަނޑު ތާޒާކަންމަތީގައި ބެހެއްޓުމަށް އެހީތެރިވެދޭނެއެވެ.