ސަރުކާރުގެ ބޯހިޔާވަހިކަމުގެ މަޝްރޫއުތަކުގެ ދަށުން ގޯއްޗާއި ފްލެޓަށް ފޯމު ހުށަހަޅާފައިވާ ފަރާތްތަކަށް، ފޯމު ހުށަހެޅުމަށްފަހު އިތުރު ބަދަލެއް ގެންނަން ބޭނުންވާނަމަ އެކަމަށް އެއް ފުރުސަތު ދިނުމަށް ހައުސިން މިނިސްޓްރީން ނިންމައިފިއެވެ. މިނިސްޓްރީން ކުރިން ނިންމާފައިވަނީ ފޯމު ހުށަހެޅުމަށްފަހު އެއްވެސް ބަދަލެއް ނުގެނެވޭ ގޮތަށެވެ.
ހައުސިން މިނިސްޓްރީން ބުނިގޮތުގައި ފުރުސަތު ދޭން ނިންމީ ބައެއް ފަރާތްތަކުގެ އަސާސީ މައުލޫމާތު ހިމެނުމުގައި މައްސަލަތަކެއް ހުރުމުން އެކަން އިސްލާހުކުރަން ބޭނުންވެގެން ގިނަ ބަޔަކު އެދެމުންދާތީ އެވެ. މިހާރުވެސް ގިނަ ބަޔަކު އީމެއިލް މެދުވެރިކޮށް މިފަދަ ހުށަހެޅުންތައް ހުށަހަޅަމުންދާކަން އެ މިނިސްޓްރީން ފާހަގަކުރެއެވެ.
"އާއިލީ ބޯހިޔާވަހިކަން" ޕްރޮގްރާމުގެ ދަށުން މައުލޫމާތު ފުރިހަމަނުކޮށް ނުވަތަ ނުބައި މައުލޫމާތު ހުށަހެޅިފައިވާ ފަރާތްތަކަށް، "ބޯހިޔާވަހިކަން" ޕޯޓަލް މެދުވެރިކޮށް ފަސޭހަކަމާއެކު ޝަކުވާ ހުށަހެޅޭނެ އިންތިޒާމު މިހާރު ވަނީ ހަމަޖައްސާފައެވެ. އެގޮތުން ޕޯޓަލްގެ މެއިން މެނޫގައި ޝަކުވާ ހުށަހެޅުމަށް ހާއްސަ ޓެބެއް ހިމަނާފައިވާނެ ކަމަށް މިނިސްޓްރީން ބުންޏެވެ. މި ފުރުސަތު ހުޅުވާލާފައިވަނީ އަންނަ އޭޕްރީލް މަހުގެ 30 ވަނަ ދުވަހުގެ ނިޔަލަށެވެ.
ފޯމަށް ބަދަލު ގެނައުމަށް އެދި ކޮންމެ މީހަކަށްވެސް ދެވޭނީ އިތުރު އެންމެ ފުރުސަތެކެވެ. އަދި މި ޝަކުވާ ހުށަހެޅޭނީ ފޯމު ހުށަހެޅުމަށް މިނިސްޓްރީން ކަނޑައަޅާފައިވާ ސުންގަޑީގެ ތެރޭގައި އެކަންޏެވެ. ސަރުކާރުން މިހާރު ވަނީ ގޯއްޗާއި ފްލެޓަށް އެދި ހުށަހެޅުމުގެ މުއްދަތު އޭޕްރިލް މަހުގެ 30 ވަނަ ދުވަހުގެ ނިޔަލަށް އިތުރުކޮށްފައެވެ.
ސަރުކާރުގެ ބޯހިޔާވަހިކަމުގެ ސްކީމްގެ ދަށުން 15,000 ގޯއްޗާއި 7,900 ފްލެޓަށް ކުރިމަތިލުމަށް ވަނީ ހުޅުވާލާފައެވެ. މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާގޮތުން، މިހާތަނަށް ޖުމުލަ 5,067 މީހުން ވަނީ ފޯމު ހުށަހަޅާފައެވެ. މީގެ ތެރެއިން ގިނަ މީހުން ކުރިމަތިލާފައިވަނީ ފްލެޓަށެވެ. އެގޮތުން ފްލެޓަށް އެދި 3,434 މީހުން ފޯމު ހުށަހަޅާފައިވާއިރު، ގޯއްޗަށް އެދި ހުށަހަޅާފައިވަނީ 1,633 މީހުންނެވެ.
