މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ މަޝްރޫއުގެ ދަށުން، ހާއްސަ އިސްކަންދެވޭ ކެޓަގަރީތަކުގެ ޝަރުތުތަކަށް ސަރުކާރުން ބޮޑެތި ބަދަލުތަކެއް ގެނެސްފިއެވެ.
ހައުސިން މިނިސްޓްރީން ގެނައި މި ބަދަލުތަކުގެ ތެރޭގައި ވަޒީފާގެ މުއްދަތާއި، ފްލެޓު ލިބުމަށްފަހު ހިދުމަތްކުރަންޖެހޭ މުއްދަތުގެ އިތުރުން، ހާއްސަ އިސްކަންދޭ އިދާރާތަކުގެ ލިސްޓަށް އާ މުއައްސަސާއެއް ވަނީ އިތުރުކޮށްފައެވެ.
ވަޒީފާގެ މުއްދަތަށް ގެނެވުނު ބަދަލާއެކު، ހާއްސަ ކެޓަގަރީއަށް ޝަރުތު ހަމަވުމަށްޓަކައި ކުރިން އޮތް 5 އަހަރުގެ މުއްދަތު މިހާރު ވަނީ 1 އަހަރު ދުވަހަށް ކުރުކޮށްފައެވެ. އެގޮތުން، ހާއްސަ އިސްކަންދެވޭ އިދާރާއެއްގައި މެދުނުކެނޑި ވޭތުވެދިޔަ އެއް އަހަރު ފުލް-ޓައިމް ވަޒީފާ އަދާކޮށްފައިވާ ފަރާތްތަކަށް މިހާރު އެ ކެޓަގަރީން ފްލެޓަށް ކުރިމަތިލުމުގެ ފުރުސަތު ލިބިގެންދާނެއެވެ.
Advertisement
ފްލެޓު ލިބުމަށްފަހު އެ އިދާރާއެއްގައި މަދުވެގެން 5 އަހަރު ދުވަހު މަސައްކަތްކުރުމަށް ކުރިން އޮތް އިގުރާރުގެ ބަދަލުގައި، މިހާރު ހަމަޖެހިފައިވަނީ ބޯހިޔާވަހިކަން ހަވާލުކުރާ ތާރީހުން ފެށިގެން އެ އިދާރާއަކުން ނުވަތަ މުއައްސަސާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާންޖެހޭ ގޮތަށެވެ.
މީގެ އިތުރުން، ހާއްސަ އިސްކަންދެވޭ އިދާރާތަކުގެ ލިސްޓަށް (ކެޓަގަރީ 6 ގެ ދަށުން) ކެޕިޓަލް މާކެޓް ޑިވެލޮޕްމަންޓް އޮތޯރިޓީ (CMDA) ވަނީ އަލަށް އިތުރުކުރެވިފައެވެ.
މިނިސްޓްރީން ބުނީ މކ ބަދަލުތަކަކީ ގިނަ ބަޔަކަށް ބޯހިޔާވަހިކަމުގެ ފުރުސަތު ފަހިކޮށްދިނުމަށް ގެނެވުނު ބަދަލުތަކެއް ކަމަށެވެ.
އެ މިނިސްޓްރީން މިހާރު ވަނީ، "ބޯހިޔާވަހިކަން އެންމެންނަން" ސްކީމްގެ ދަށުން، ގޯއްޗާއި ފްލެޓަށް ފޯމު ހުށައެޅޭ މުއްދަތުވެސް އިތުރުކޮށްފައެވެ. އެގޮތުން ގޯއްޗާއި ފްލެޓަށް އެދި ހުށައެޅުމުގެ މުއްދަތު އޭޕްރިލް މަހުގެ 30ގެ ނިޔަލަށް ވަނީ އިތުރުކޮށްފައެވެ.
