"އާއިލީ ބޯހިޔާވަހިކަން" ޕްރޮގްރާމުގެ ދަށުން ފްލެޓާއި ގޯއްޗަށް އެދި ފޯމު ހުށަހަޅާފައިވާ ފަރާތްތަކަށް، އެ ފޯމުތަކާ ގުޅޭ ގޮތުން ޝަކުވާ ހުށަހެޅުމުގެ ފުރުސަތު ހައުސިން މިނިސްޓްރީން މިއަދު ހުޅުވާލައިފި އެވެ.
މި ފުރުސަތު ހުޅުވާލާފައިވަނީ އަންނަ އޭޕްރީލް މަހުގެ 30 ވަނަ ދުވަހުގެ ނިޔަލަށެވެ. ހައުސިން މިނިސްޓްރީން ބުނި ގޮތުގައި، މި ފުރުސަތަކީ ފޯމު ހުށަހެޅުމުގައި މައުލޫމާތު ފުރިހަމަ ނުކޮށް ނުވަތަ ނުބައި މައުލޫމާތު ހުށަހެޅިފައިވާ މީހުންނަށް އެކަންކަން އިސްލާހުކުރުމަށް ދެވޭ ފުރުސަތެކެވެ. ޝަކުވާ ހުށަހެޅުމަށް ބޭނުންވާ ފަރާތްތަކަށް "ބޯހިޔާވަހިކަން ޕޯޓަލް" ގެ މެއިން މެނޫގައިވާ ޝަކުވާ ހުށަހެޅުމަށް ހާއްސަ ޓެބު މެދުވެރިކޮށް އެކަން ކުރެވޭނެއެވެ. ނަމަވެސް، މިނިސްޓްރީން ބުނެފައިވަނީ ޝަކުވާ ހުށަހެޅުމަށް ދޭނީ އެންމެ ފުރުސަތެއް ކަމަށެވެ.
މި ސަރުކާރުގެ ބޯހިޔާވަހިކަމުގެ ފުރަތަމަ މަޝްރޫއުގެ ދަށުން ދޫކުރާ ގޯއްޗާއި ފްލެޓަށް އެދުމަށް ފޯމު ހުށަހަޅަން ދިން މުއްދަތުވެސް މިހާރު ވަނީ އަންނަ އޭޕްރީލް މަހުގެ 30 ގެ ނިޔަލަށް އިތުރުކޮށްފައެވެ. ކުރިން ގޯއްޗަށް އެދުމުގެ ފުރުސަތު މި މަހުގެ 4 ވަނަ ދުވަހަށް ހަމަވިއިރު، ފްލެޓަށް ކުރިމަތިލުމަށް ދީފައިވާ މުއްދަތަކީ އަންނަ މަހުގެ 17 އެވެ.
"އާއިލީ ބޯހިޔާވަހިކަން" ޕްރޮގްރާމްގެ ދަށުން ޖުމްލަ 7,900 ފްލެޓާއި 15,000 ގޯތި ދޫކުރުމަށް ވަނީ ނިންމާފައެވެ. މީގެ ތެރޭގައި މާލޭގެ ރަށްވެހިންނަށް ހާއްސަ 4,000 ފްލެޓާއި، މާލޭގައި ދިރިއުޅޭ ނަމަވެސް ރަށްވެހިވެފައި ނުވާ މީހުންނަށް 1,500 ފްލެޓް އަދި ހާއްސަ ކެޓަގަރީތަކަށް 2,400 ފްލެޓް ހިމެނެއެވެ.
ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ރަސްމާލެއިން 25,000 ގޯތި ދޫކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. އެހެންނަމަވެސް، މި މަޝްރޫއުގެ ފުރަތަމަ ބުރުގައި ދޫކުރުމަށް ހަމަޖެހިފައިވަނީ 15,000 ގޯއްޗެވެ.
