ބޭނުންވީމާ އެއް ގައުމަކުން އަނެއް ގައުމަކަށް ހަމަލާދީ އިސްތިގުލާލަށް އަރައިގަތުމަކީ އެއްވެސް އުސޫލެއް ނޫން ކަމަށާއި، ހުރިހާ ގައުމުތަކުން ވެސް ބައިނަލްއަގުވާމީ ގާނޫނުތަކަށް (އިންޓަނޭޝަނަލް ލޯ) ބޯލަނބަންޖެހޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ރައީސް ވަނީ އިޒްރޭލާއި އެމެރިކާގެ އަމަލުތަކަށް ވަރަށް ބޮޑަށް ފާޑުވިދާޅުވެފަ އެވެ. ރައީސް ވިދާޅުވީ، ވަކި ގައުމަކުން ބޭނުންވާއިރަށް އަނެއް ގައުމަކަށް ހަމަލާދިނުމަކީ ބައިނަލްއަގުވާމީ މުޖުތަމައުގައި ބަލައިގަނެވޭނެ ކަމެއް ނޫން ކަމަށެވެ. އަދި ދުނިޔޭގެ ހަމަޖެހުން ގާއިމުކުރެވޭނީ ހުރިހާ ގައުމަކުން ވެސް އިންޓަނޭޝަނަލް ލޯ ފޮލޯ ކޮށްގެން ކަމަށް އެމަނިކުފާނު ފާހަގަކުރެއްވި އެވެ.
އިޒްރޭލާ މެދު ރައީސް ގެންގުޅުއްވާ ހަރުކަށި ސިޔާސަތު ހާމަކުރައްވަމުން އެމަނިކުފާނު ވިދާޅުވީ، އިޒްރޭލަކީ އެމަނިކުފާނު ވަރަށް ނުރުހޭ ގައުމެއް ކަމަށާއި، އެއީ ޓެރަރިސްޓް ގައުމެއް ކަމަށެވެ. ފަލަސްތީނުގެ މުސްލިމުންނާ ދެކޮޅަށް އިޒްރޭލުން ހިންގަމުންދާ ލާއިންސާނީ އަމަލުތަކާއި ހަނގުރާމައިގެ ޖަރީމާތައް ރައީސް ވަނީ މީގެ ކުރިން އެތައް ފަހަރަކު ހަރުކަށި އިބާރާތުން ކުށްވެރިކުރައްވާފަ އެވެ.
މީގެ އިތުރުން، މި ހަނގުރާމައިގައި އިސްލާމީ އުންމަތުގެ ކޮންމެ މެންބަރަކު ވަކިވެދިޔުމަކީ، ނުވަތަ ކޮންމެ މުސްލިމަކު ޝަހީދުވުމަކީ އެމަނިކުފާނު ނުހަނު ބޮޑަށް ހިތާމަކުރައްވާ ކަމެއް ކަމަށް ރައީސް ވިދާޅުވި އެވެ. އެމަނިކުފާނު ވަނީ މި ސަރުކާރުން އަބަދުވެސް މަސައްކަތް ކުރަމުންދާނީ އަރަބި އިސްލާމީ ގައުމުތަކާ އެކީގައި ކަމަށް ވިދާޅުވެފަ އެވެ.
