ރާއްޖޭގެ ގްރޮސް ރިޒާވް 1.7 ބިލިއަން ޑޮލަރަށް އަރާފައިވާ ކަމަށާއި، މިއީ ރާއްޖޭގެ ތާރީހުގައިވެސް ރިޒާވް މިހާ މައްޗަށް ދިޔަ ފުރަތަމަ ފަހަރު ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ އިގްތިސާދީ ހާލަތު ރަނގަޅު ކުރުމަށް ސަރުކާރުން ކުރަމުންދާ މަސައްކަތްތަކުގެ ނަތީޖާ ފެންނަން ފަށާފައިވާ ކަމަށެވެ. އެގޮތުން ގްރޮސް ރިޒާވް މިހާރު ހުރި މިންވަރަކީ މީގެ ކުރިން ދުވަހަކުވެސް ރާއްޖޭގެ ރިޒާވް މައްޗަށް ނުދާ މިންވަރެއްގެ ރެކޯޑު އަދަދެއްކަން ރައީސް ފާހަގަކުރެއްވި އެވެ.
ސުކޫކު ޕޭމަންޓާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، ބޭރުގެ ދަރަނިތައް ދެއްކުމަށް ސަރުކާރުން ވަރަށް ބޮޑު އިސްކަމެއް ދޭ ކަމަށެވެ. އެގޮތުން ސުކޫކު ޕޭމަންޓުތަކަށް ދައްކަންޖެހޭ ފައިސާ ދެއްކުމަށްޓަކައި މިވަގުތުވެސް 650 މިލިއަން ޑޮލަރު ތައްޔާރުކުރެވިފައި އެބަހުރި ކަމުގެ ޔަގީންކަން ރައީސް ދެއްވި އެވެ.
Advertisement
މިއަދުގެ ނޫސްވެރިންގެ ބައްދަލުވުމުގައި ރައީސް އިތުރަށް ވިދާޅުވީ، ރާއްޖޭގެ މާލީ ހާލަތު ހަރުދަނާކޮށް، ބޭރުގެ މާލީ އިދާރާތަކުގެ އިތުބާރު ހޯދުމަށް ސަރުކާރުން ގިނަ ފިޔަވަޅުތަކެއް އަޅަމުންދާ ކަމަށެވެ. އަދި ރިޒާވް މިހާ މަތީ މިންވަރެއްގައި ހިފެހެއްޓުމަކީ ރާއްޖޭގެ އިގްތިސާދީ ރައްކާތެރިކަމަށް ލިބުނު ވަރަށް ބޮޑު ކުރިއެރުމެއްގެ ގޮތުގައި އެމަނިކުފާނު ސިފަކުރެއްވި އެވެ.
