ދިވެހިރާއްޖޭގެ ޑިމޮކްރަސީ އެންމެ ބޮޑަށް ފައްކާވެފައިވަނީ ވޭތުވެދިޔަ ދެ އަހަރު ދުވަހުގެ ތެރޭގައި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. ރައީސް މިހެން ވިދާޅުވީ މިއަދު ރައީސުލްޖުމްހޫރިއްޔާގެ އޮފީހުގައި މިވަގުތު ކުރިއަށްދާ ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، ރާއްޖޭގައި ޑިމޮކްރަސީގެ ހަމަތަކާއި އުސޫލުތައް އެންމެ ފުރިހަމައަށް ހިނގަމުންދާކަން މިދިޔަ ދެ އަހަރުގެ ތެރޭގައި ވަނީ ސާބިތުވެފަ އެވެ. މިކަމުގެ އެންމެ ބޮޑު ހެއްކަކީ، ސަރުކާރާ އިދިކޮޅު ފަރާތްތަކުން ބާއްވާ ހަރަކާތްތަކަށް ސަރުކާރުން ފޯރުކޮށްދޭ އެއްބާރުލުން ކަމަށް އެމަނިކުފާނު ފާހަގަކުރެއްވިއެވެ.
މިގޮތުން، އިދިކޮޅު ސިޔާސީ ޕާޓީތަކުން ބާއްވާ ކައުންސިލް ޕްރައިމަރީތައް ބޭއްވުމަށްޓަކައި ސަރުކާރުގެ ސްކޫލްތައް ދޫކުރުމަކީ ޑިމޮކްރަސީ ފައްކާވެފައިވާ މިންވަރު ދޭހަވާ އެންމެ ބޮޑު އެއް ކަންތައް ކަމުގައި ރައީސް ވިދާޅުވި އެވެ. މީގެ ކުރީގެ އަހަރުތަކާ ހިލާފަށް، ސިޔާސީ ހަރަކާތްތަކަށް ހަމަހަމަ ފުރުސަތު ފަހިކޮށްދިނުމަކީ މި ސަރުކާރުން އިސްކަންދޭ ކަމެއްކަން ރައީސް ފާހަގަކުރެއްވިއެވެ.
މީގެ އިތުރުން، މި ސަރުކާރުން ސިޔާސީ މިނިވަންކަމަށް އިސްކަންދޭ މިންވަރު ހާމަކުރައްވަމުން ރައީސް ވިދާޅުވީ، ސިޔާސީ ގޮތުން އެއްވެސް ފަރާތެއް ހައްޔަރުކޮށްފައި ނުވާނެ ކަމަށެވެ. މިއީ ޑިމޮކްރަސީގެ މުހިންމު ސިފައެއް ކަމަށް އެމަނިކުފާނު ވިދާޅުވިއެވެ.
ރައީސް އޮފީހުގައި ކުރިއަށްދިޔަ މި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ވަނީ ގައުމުގެ ސިޔާސީ މަސްރަހާއި، ޑިމޮކްރަސީ ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކާ ގުޅޭގޮތުން އިތުރު ތަފްސީލު ދެއްވާފަ އެވެ.
