މެދުއިރުމަތީގައި މިވަގުތު ކުރިއަށްދާ ހަނގުރާމައާ ގުޅިގެން ރާއްޖެއަށް ބޭނުންވާ ކާބޯތަކެއްޗާއި ތެޔޮ ހޯދުމުގައި މިވަގުތު އެއްވެސް ދަތިކަމެއް ނެތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިވަގުތު ކުރިއަށްދާ ނޫސްވެރިންގެ ބައްދަލުވުމުގައި، ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. ރައީސް ވިދާޅުވީ، މެދުއިރުމަތީގައި މިހާރު ކުރިއަށްދާ ހަނގުރާމައާ ގުޅިގެން ދުނިޔޭގެ ބާޒާރަށް އަންނަ ބަދަލުތަކާއެކުވެސް، ރާއްޖެއަށް ބޭނުންވާ އަސާސީ ތަކެތި ލިބުމުގައި އެއްވެސް ހުރަހެއް ނެތް ކަމުގެ ޔަގީންކަން ސަރުކާރަށް އެބައޮތް ކަމަށެވެ.
ރައީސް އިތުރަށް ވިދާޅުވީ، ރާއްޖެއަށް ބޭނުންވާ ކާބޯތަކެއްޗާއި ތެލުގެ ރިޒާވް ހުރި ގޮތުންނާއި، އެ ތަކެތި ސަޕްލައި ކުރުމުގެ އިންތިޒާމުތައް ހަމަޖެހިފައިވާ ގޮތުން މިވަގުތަށް އެއްވެސް ދަތިކަމެއް ކުރިމަތިނުވާނެ ކަމަށެވެ. އަދި ހާލަތަށް އަންނަ ބަދަލުތައް ސަރުކާރުން ވަރަށް ގާތުން ބަލަމުންދާ ކަމަށާއި، ރައްޔިތުންނަށް ބޭނުންވާ އަސާސީ ހިދުމަތްތަކާއި ތަކެތި މެދުނުކެނޑި ފޯރުކޮށްދިނުމަށް ކުރަންޖެހޭ ހުރިހާ މަސައްކަތެއް ކުރައްވާނެ ކަމުގެ ޔަގީންކަން އެމަނިކުފާނު ދެއްވި އެވެ.
މެދުއިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، ދުނިޔޭގެ ގިނަ ގައުމުތަކަކުން އަންނަނީ އިގްތިސާދީ ގޮތުންނާއި ތަކެތި ލިބުމުގައި ދަތިތަކެއް ކުރިމަތިވެދާނެ ކަމަށް ބަލައި ރައްކާތެރިކަމުގެ ފިޔަވަޅުތައް އަޅަމުންނެވެ. އެހެންނަމަވެސް، ރައީސް މުއިއްޒު ވިދާޅުވީ ރާއްޖޭގެ ހާލަތު މިވަގުތު އޮތީ ރަނގަޅަށް ކަމަށެވެ.
