ދައުލަތުން ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނު ކަމުގައިވީ ނަމަވެސް، އެ ފައިސާ ދެއްކުމުގެ ގާބިލުކަން ސަރުކާރުގައި އެބަހުރި ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
ރައީސުލްޖުމްހޫރިއްޔާ މިހެން ވިދާޅުވީ، ރާއްޖޭގެ މާލީ ހާލަތާއި ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. ރައީސް ވިދާޅުވީ ސުކޫކަށް ދައްކަންޖެހޭ ފައިސާ ދެއްކުމަށްޓަކައި ކުރަންޖެހޭ ހުރިހާ ތައްޔާރީތަކެއް ސަރުކާރުން ވަނީ ފުރިހަމަކޮށްފައި ކަމަށެވެ.
"ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނަސް އެ ފައިސާ ދެއްކުމުގެ ފުރިހަމަ ގާބިލުކަން ސަރުކާރުގައި އެބަހުރި. އެކަމަށް ބޭނުންވާ ފައިސާ ވަނީ ހަމަޖެހިފައި،" ރައީސް ވިދާޅުވި އެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، ރާއްޖޭގެ އިގްތިސާދީ ހާލަތު ރަނގަޅު ކުރުމަށްޓަކައި ސަރުކާރުން ގިނަ ފިޔަވަޅުތަކެއް އަޅަމުންދާ ކަމަށާއި، ބޭރުގެ މާލީ އިދާރާތަކުން ރާއްޖެއަށް އޮތް އިތުބާރު ބޮޑުވަމުންދާ ކަމަށެވެ. އަދި ދަރަނި ދެއްކުމުގައި އެއްވެސް ދަތިކަމެއް ނެތް ކަމަށާއި، ރާއްޖޭގެ މާލީ ނިޒާމު އޮތީ ހަރުދަނާކޮށް ކަމަށްވެސް އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ އޭޕްރީލް މަހު ދައްކަން ޖެހޭ ސުކޫކު ޕޭމަންޓު ތާރީހަށް ސަރުކާރުން ދައްކާނެ ކަމަށާއި، މުޅި ޖުމްލަ އެކަމަށް 650 މިލިއަން ޑޮލަރު މިވަގުތު ވެސް ރައްކާކޮށްފައިވާ ކަމަށެވެ.
މީގެ އިތުރުން، ރައީސް ވިދާޅުވީ ސަރުކާރުގެ އަމާޒަކީ ރައްޔިތުންނަށް ދަތިނުވާނެ ގޮތަކަށް އިގްތިސާދީ އިސްލާހީ ފިޔަވަޅުތައް ކުރިއަށް ގެންދިއުން ކަމަށެވެ. މިގޮތުން ދައުލަތުގެ ހަރަދުތައް ކުޑަކުރުމަށާއި، އާމްދަނީ އިތުރުކުރުމަށް ކުރެވެމުންދާ މަސައްކަތްތަކުގެ ނަތީޖާ ފެންނަމުންދާ ކަމަށްވެސް ރައީސުލްޖުމްހޫރިއްޔާ ވިދާޅުވި އެވެ.
