ކ. މާފުށްޓާއި އެ ރަށް ކައިރީގައި އަލަށް ހިއްކާފައިވާ ސަރަހައްދު ގުޅުވައިދޭ ބުރިޖުގެ އަމަލީ މަސައްކަތް މިއަދު ރަސްމީކޮށް ފަށައިފި އެވެ.

މި މަޝްރޫއުގެ އަމަލީ މަސައްކަތް ފެށުމަށް މިއަދު މާފުށީގައި ބޭއްވި ހާއްސަ ރަސްމިއްޔާތެއްގައި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާގެ ސްޓޭޓް މިނިސްޓަރު އިސްމާއީލް ހަމީދު ބައިވެރިވެވަޑައިގެންނެވި އެވެ. މީގެ އިތުރުން ރައްޔިތުންގެ މަޖިލީހުގެ މާފުށީ ދާއިރާގެ މެންބަރު ހުސައިން ރިޟާ އާއި، އެމް.ޓީ.ސީ.ސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ޖަމްޝީދު އަދި މާފުށީ ކައުންސިލްގެ މެންބަރުން މި ރަސްމިއްޔާތުގައި ބައިވެރިވެވަޑައިގެން މަސައްކަތް ރަސްމީކޮށް ފައްޓަވައިދެއްވި އެވެ.

މި މަޝްރޫއަކީ މާފުށީގެ ބިމުގެ ދަތިކަން ހައްލުކުރުމަށްޓަކައި ހިއްކާފައިވާ ސަރަހައްދާއި މައި ރަށް ގުޅާލުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުރިއަށްގެންދާ މުހިންމު އުމްރާނީ މަޝްރޫއެކެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާ ހަވާލުކޮށްގެން ކުރިއަށްގެންދާ މި މަޝްރޫއުގެ އަގަކީ 35.4 މިލިއަން ރުފިޔާ އެވެ.

މި މަޝްރޫއުގެ ދަށުން މާފުށީގެ ދެ ސަރަހައްދު ގުޅުވައިދިނުމަށް 137 މީޓަރުގެ ދިގު ބުރިޖެއް ތަރައްގީކުރުމަށް ވަނީ ހަމަޖެހިފަ އެވެ. މި ބުރިޖު ފަރުމާކޮށްފައިވަނީ ހިނގާ މީހުންނަށާއި އުޅަނދުފަހަރަށް ފަސޭހައިން ދަތުރުކުރެވޭނެ ގޮތަށެވެ.

މި މަޝްރޫއު ނިމުމުން މާފުށީގެ އިގްތިސާދީ އަދި އިޖުތިމާއީ ހަރަކާތްތަކަށް ބޮޑު ކުރިއެރުމެއް ލިބި، ރަށުގެ ރައްޔިތުންނަށާއި ފަތުރުވެރިންނަށް ދަތުރުފަތުރުގެ ފަސޭހަކަން ލިބިގެންދާނެ އެވެ. ހާއްސަކޮށް، އަލަށް ހިއްކި ސަރަހައްދުގައި މީހުން އާބާދުވުމަށާއި ވިޔަފާރިތައް ފުޅާކުރުމަށް މި ބުރިޖުގެ ސަބަބުން މަގުފަހިވެގެންދާނެ ކަމަށް ސަރުކާރުން ބުނެ އެވެ.

އެމް.ޓީ.ސީ.ސީ އިން ބުނި ގޮތުގައި، މި މަޝްރޫއުގެ މަސައްކަތް ބާރުމިނުގައި ކުރިއަށްގެންގޮސް، ކަނޑައެޅިފައިވާ މުއްދަތުގެ ތެރޭގައި މަސައްކަތް ނިންމައި ރައްޔިތުންގެ ބޭނުމަށް ބުރިޖު ހުޅުވާލުމަކީ އެ ކުންފުނީގެ އަމާޒެވެ.