މެދުއިރުމަތީގައި އުފެދިފައިވާ ނުތަނަވަސްކަމާއި ހަމަނުޖެހުންތަކުގެ ސަބަބުން ރާއްޖޭގެ އިޤްތިސާދަށް ކުރިމަތިވެދާނެ ނުރައްކާތަކުން ސަލާމަތްވުމަށްޓަކައި ސަރުކާރުން ފުރިހަމައަށް ތައްޔާރުވެފައިވާ ކަމުގެ ޔަޤީންކަން މިނިސްޓްރީ އޮފް ފައިނޭންސްއިން ދީފި އެވެ.

މިނިސްޓްރީ އިން ބުނި ބައިނަލްއަގުވާމީ މަސްރަޙަށް އަންނަ ބަދަލުތަކުން ރާއްޖޭގެ މާލީ ނިޒާމަށް ކުރާނެ އަސަރުތައް އެ މިނިސްޓްރީން ވަރަށް ގާތުން މޮނިޓަރު ކުރަމުން އަންނަ ކަމަށެވެ. އަދި ވަކިން ޚާއްޞަކޮށް، ރާއްޖެއަށް ބޭނުންވާ ތެލުގެ ސަޕްލައި މެދުނުކެނޑި ލިބޭނެ ގޮތް ހެދުމަށްޓަކައި އެސް.ޓީ.އޯ އާ ގުޅިގެން ޚާއްޞަ މަސައްކަތްތަކެއް ކުރަމުންދާ ކަމަށް ފިނޭންސް މިނިސްޓްރީ އިން ވަނީ ބުނެފަ އެވެ.

މީގެ އިތުރުން، ފަތުރުވެރިކަމުގެ ދާއިރާއަށް ކުރިމަތިވެދާނެ ގޮންޖެހުންތަކަށް ރިޢާޔަތްކޮށް، މާލީ ސިޔާސަތުތަކަށް ގެންނަންޖެހޭ ބަދަލުތައް ގެނައުމަށް ރޭވިފައިވާ ކަމަށާއި, ދައުލަތުގެ މާލީ ހަމަޖެހުން ހިފެހެއްޓުމަށްޓަކައި އަޅަންޖެހޭ އެންމެހައި ފިޔަވަޅުތައް ސަރުކާރުން މެދުކެނޑުމެއްނެތި އަޅަމުންދާނެ ކަމުގެ ޔަޤީންކަން ފައިނޭންސް މިނިސްޓްރީގެ ބަޔާނުގައި ވަނީ ދީފަ އެވެ.

އަދި އެމްއެމްއޭގެ ތަފާސްހިސާބުތަކަށް ބަލާއިރު ރާއްޖޭގެ ރިޒާވް މިވަގުތު މަތީ މިންވަރެއްގައި ހުރުމަކީ، ބައިނަލްއަޤުވާމީ އިޤްތިސާދީ ލޮޅުންތަކުން އަރައިގަތުމަށާއި, މުދާ އެތެރެކުރުމަށް ލިބޭނެ ބޮޑު ފަސޭހައެއް ކަމަށް ފާހަގަކޮށްފައިވެ އެވެ.