އިސްރާއީލުން އީރާނަށް އަމާޒުކޮށް ވަރުގަދަ ހަމަލާތަކެއް ދެމުންދާއިރު، މިއީ އެއްގަމު މަގުން ސިފައިން ބޭނުންނުކޮށް، ދުރުގައި ތިބެގެން ވައިގެ މަގުން ދޭ "ރިމޯޓް ސްޓޭންޑްއޮފް" ހަމަލާތަކެއް ކަމަށާއި، މިފަދަ ހަމަލާތަކަކުން އީރާނުގެ ވެރިކަން ވައްޓާނުލެވޭނެ ކަމަށް ކިންގްސް ކޮލެޖް ލަންޑަންގެ ސެކިއުރިޓީ ސްޓަޑީޒްގެ އެސޯސިއޭޓް ޕްރޮފެސަރު އެންޑްރިއަސް ކްރީގް ބުނެފި އެވެ.
އަލްޖަޒީރާއާ ވާހަކަދައްކަވަމުން ކްރީގް ވިދާޅުވީ، އީރާނުގެ ވެރިކަން ބަދަލުކުރުމަށް އިސްރާއީލާއި އެމެރިކާއިން ގެންގުޅޭ ރޭވުންތަކުގައި ވަރަށް މުހިންމު ބައެއް މަދުވާ ކަމަށެވެ. އެއީ އެއްގަމު މަގުން ސިފައިން ފޮނުވައިގެން ބިންތައް ހިފުމެވެ. އިސްރާއީލުން ގަބޫލުކުރާ ގޮތުގައި އީރާނުގެ ސަރުކާރާ މެދު ހިތްހަމަނުޖެހިފައި ތިބި ރައްޔިތުން މެދުވެރިކޮށް އެ ގައުމުގެ ވެރިކަން ވައްޓާލެވިދާނެއެވެ. ނަމަވެސް، އީރާނުގައި ވަރުގަދަ އަދި ގުޅިފައިވާ އިދިކޮޅު ހަރަކާތެއް ނެތުމާއި، ރައްޔިތުންނަށް ހަތިޔާރު ލިބޭނެ މަގެއް ނެތުމުން އެއީ ވާނެ ކަމެއް ކަމަށް ނުބެލެވޭ ކަމަށް އޭނާ ފާހަގަކުރި އެވެ.
"މިއީ އަސާސީ ގޮތެއްގައި ވައިގެ ބާރުގެ ބޭނުންކޮށްގެން ދޭ ހަމަލާތަކެއް. މީގެ ސަބަބުން އީރާނުގެ އަސްކަރީ ގާބިލުކަން ކުޑަކުރެވިދާނެ. އެކަމަކު ބިންތައް ހިފައި، އެ ތަންތަން ކޮންޓްރޯލް ނުކޮށް، ހަމައެކަނި މިފަދަ ހަމަލާތަކަކުން އީރާނުގެ ވެރިކަން ވެއްޓިގެން ހިނގައިދާނެ ކަމަކަށް ނުބެލެވޭ،" ކްރީގް ބުންޏެވެ.
Advertisement
މީގެ އިތުރުން، އެމެރިކާއިން ހަމަލާދޭން ބޭނުންވާ ތަންތަނުގެ ލިސްޓު ކުރިއަށް އޮތް މަދު ދުވަސްކޮޅެއްގެ ތެރޭގައި ފުރިހަމަވާނެ ކަމަށާއި، އޭގެ ފަހުން އެމެރިކާގެ ބާރު ކެނޑިގެންދާނެ ކަމަށް ވެސް އޭނާ ލަފާކުރި އެވެ.
މި ހަމަލާތަކާ ގުޅިގެން އީރާނުގެ ވެރިރަށް ތެހެރާނުން ބާރުގަދަ ގޮވުންތަކުގެ އަޑު އިވެމުންދާއިރު، އިސްރާއީލުން ދަނީ އީރާނުގެ އެކި ސަރަހައްދުތަކަށް ވައިގެ މަގުން ހަމަލާތައް ފޮނުވަމުންނެވެ. މި މަސްރަހު މިހާރު އޮތީ މުޅި މެދުއިރުމަތީގައި ހަނގުރާމައެއް ފެށިދާނެ ފަދަ ނުރައްކާތެރި ފައްތަރެއްގަ އެވެ.
