އެމެރިކާ-އީރާން ހަނގުރާމައިގެ ސަބަބުން ޢިރާޤަށް 60 ބިލިއަން ޑޮލަރުގެ ގެއްލުން ވެއްޖެ

އެމެރިކާއާއި އީރާނާ ދެމެދު ހިނގަމުންދާ ނުރައްކާތެރި ހަނގުރާމައިގެ ސަބަބުން ޢިރާޤުގެ އިޤްތިޞާދަށާއި އުމްރާނީ ވަސީލަތްތަކަށް ލިބުނު މާލީ ގެއްލުން 60 ބިލިއަން އެމެރިކާ ޑޮލަރަށް އަރާފައިވާ ކަމަށް އެ ޤައުމުގެ ޚާރިޖީ ވަޒީރު ހާމަކުރައްވައިފިއެވެ.

ސަރަޙައްދީ ހަމަނުޖެހުންތަކާ ގުޅޭގޮތުން ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވީ، ދެ ޤައުމުގެ ދެމެދުގައި ކުރިއަށްދާ މި ހަނގުރާމައިގެ މައިދާނަކަށް ޢިރާޤު ވެގެން ދިއުމަކީ އެ ޤައުމަށް ބަދަލު ނުދެވޭ ފަދަ ބޮޑެތި ގެއްލުންތަކެއް ކުރިމަތިވި ކަމެއް ކަމަށެވެ. އަދި މި ހަނގުރާމައިގެ ސަބަބުން ތެލުގެ އުފެއްދުންތަކަށާއި، ޢާންމު ވިޔަފާރިއަށާއި، މަދަނީ އުމްރާނީ ވަސީލަތްތަކަށް ބޮޑެތި ލޮޅުންތަކެއް އަރާފައިވާ ކަމަށްވެސް އޭނާ ފާހަގަކުރެއްވިއެވެ.

މީގެއިތުރުން، ޢިރާޤުގެ އިސްތިޤްލާލާއި ސިޔާދަތަށް އިޙްތިރާމް ކުރުމަށާއި، ބޭރުގެ ބާރުތަކުގެ ޚިޔާލުތަފާތުވުންތައް ޙައްލުކުރާ ތަނަކަށް ޢިރާޤުގެ ބިން ނުހެދުމަށް ޚާރިޖީ ވަޒީރު ވަނީ ގޮވާލައްވާފައެވެ. އަދި މި ހަނގުރާމައިގެ ސަބަބުން މުޅި ސަރަޙައްދުގެ އަމަންއަމާންކަމަށް ބޮޑު ނުރައްކަލެއް ކުރިމަތިވެފައިވާތީ، ޢަރަބި އަދި ބައިނަލްއަޤްވާމީ މުޖުތަމަޢުން މިކަމަށް އަވަސް ޙައްލެއް ހޯދުމަށް މަސައްކަތް ކުރުމަށްވެސް އޭނާ އިލްތިމާސް ކުރެއްވިއެވެ.

އެމެރިކާއާއި އީރާނުގެ މަސްރަޙު ގޯސްވެ، އެއް ޤައުމުން އަނެއް ޤައުމަށް ދެމުންދާ ޙަމަލާތަކުގެ ސަބަބުން މެދުއިރުމަތީގެ ގިނަ ޤައުމުތަކަކަށް އޭގެ ނޭދެވޭ އަސަރު ދަނީ ފޯރަމުންނެވެ. މިގޮތުން ޢިރާޤަކީ ޖިއޮގްރަފީ ގޮތުން މި ދެ ބާރުގެ ދެމެދުގައިވާ ޤައުމަކަށް ވުމުން، ހަނގުރާމައިގެ އެންމެ ބޮޑު ގެއްލުމަކާ ކުރިމަތިލާން ޖެހިފައިވާ އެއް ޤައުމެވެ.