އިސްރާއީލާއި އެމެރިކާއިން އީރާނަށް ދެމުންދާ ހަމަލާތަކާ ގުޅިގެން، މަޝްވަރާގެ މަގުން މައްސަލަ ހައްލުކުރުމަށްޓަކައި އެމެރިކާއާއި އީރާނާ ދެމެދު މެދުވެރިއެއްގެ ދައުރު އަދާކުރަން ތައްޔާރަށް ހުންނެވި ކަމަށް އިންޑޮނޭޝިޔާގެ ރައީސް ޕްރަބޯވޯ ސުބިއަންތޯ ވިދާޅުވެއްޖެ އެވެ.

އިންޑޮނޭޝިޔާގެ ފޮރިން މިނިސްޓްރީން އެކްސްގައި ކުރި ޕޯސްޓެއްގައި ބުނެފައިވަނީ، އެމެރިކާއާއި އީރާނާ ދެމެދު ކުރިއަށްދިޔަ މަޝްވަރާތައް ނާކާމިޔާބުވެ، މެދުއިރުމަތީގައި އަސްކަރީ ކުރިމަތިލުންތައް އިތުރުވަމުންދާތީ އެކަމާ އިންޑޮނޭޝިޔާ އިން ނުހަނު ހިތާމަކުރާ ކަމަށެވެ. އަދި ހުރިހާ ފަރާތްތަކަކުން ވެސް ކެތްތެރިކަން އިސްކޮށް، މަޝްވަރާއާއި ޑިޕްލޮމަސީގެ މަގަށް އިސްކަންދިނުމަށް އެ ގައުމުން ވަނީ ގޮވާލާފަ އެވެ.

މިނިސްޓްރީގެ ބަޔާނުގައި އިތުރަށް ބުނެފައިވަނީ، ސަރަހައްދުގެ ސަލާމަތާއި ރައްކާތެރިކަން އަލުން ގާއިމުކުރުމަށްޓަކައި ދެ ފަރާތުގެ ދެމެދުގައި ވާހަކަދެއްކުންތައް ފެސިލިޓޭޓް ކޮށްދިނުމަށް އިންޑޮނޭޝިޔާގެ ސަރުކާރާއި ރައީސް ތައްޔާރަށް ތިއްބެވި ކަމަށެވެ. އަދި ދެ ގައުމުން އެއްބަސްވާނަމަ، މެދުވެރިއެއްގެ ދައުރު އަދާކުރެއްވުމަށް ރައީސް ޕްރަބޯވޯ ސުބިއަންތޯ އީރާނުގެ ތެހެރާނަށް ދަތުރުފުޅެއް ކުރެއްވުމަށް ވެސް ތައްޔާރަށް ހުންނެވި ކަމަށް އެ ގައުމުން ހާމަކޮށްފައިވެއެވެ.

މި ހަމަނުޖެހުންތަކުގެ ސަބަބުން މުޅި ސަރަހައްދުގެ ހަމަޖެހުމާއި، ދުނިޔޭގެ ސުލްހައާއި އަމާންކަމަށް ބުރޫއަރައިފާނެ ކަމުގެ ބިރު އޮތްކަން ވެސް އިންޑޮނޭޝިޔާގެ ފޮރިން މިނިސްޓްރީން ވަނީ ފާހަގަކޮށްފަ އެވެ.