މެދުއިރުމަތީގެ މަޝްރަޙަށް އަންނަމުންދާ ބަދަލުތަކާއި، އިސްރާއީލުން އީރާނަށް ދެމުންދާ ހަމަލާތަކާ ގުޅިގެން ސަލާމަތީ ސަބަބުތަކަށްޓަކައި ބައިނަލްއަގުވާމީ ގިނަ އެއާލައިންތަކަކުން އެ ސަރަޙައްދުގެ ގައުމުތަކަށް ކުރާ ދަތުރުތައް މެދުކަނޑާލައިފިއެވެ.

މިގޮތުން ދަތުރުތަކަށް ބަދަލު ގެނައި އެއާލައިންތަކުގެ ތެރޭގައި:

އެއާ ފްރާންސް: ފްރާންސްގެ މި އެއާލައިނުން ވަނީ ހޮނިހިރު ދުވަހު އިސްރާއީލުގެ ތެލް އަވީވް އަދި ލެބަނަންގެ ބޭރޫތަށް ކުރަން ހަމަޖެހިފައިވާ ހުރިހާ ދަތުރުތަކެއް ކެންސަލްކޮށްފައެވެ.

ލުފްތަންސާ: ޖަރުމަނުގެ ލުފްތަންސާ އެއާލައިނުން ވަނީ މާޗު 7 ވަނަ ދުވަހުގެ ނިޔަލަށް ތެލް އަވީވް، ބޭރޫތު އަދި އޮމާނަށް ކުރާ ދަތުރުތައް ހުއްޓާލާފައެވެ. އަދި ހޮނިހިރުން ފެށިގެން އާދިއްތަ ދުވަހުގެ ނިޔަލަށް ދުބާއީގެ ދަތުރުތައް މެދުކަނޑާލުމުގެ އިތުރުން، އިސްރާއީލު، ލެބަނަން، އުރުދުން، އިރާގު އަދި އީރާނުގެ ވައިގެ ސަރަޙައްދު ބޭނުންނުކުރުމަށް ވަނީ ނިންމާފަ އެވެ.

ޓާކިޝް އެއާލައިންސް: މި އެއާލައިނުން ވަނީ ހޮނިހިރު ދުވަހު ގަތަރު، ކުވައިތު، ބަހްރޭން، ޔޫއޭއީ އަދި އޮމާނަށް ކުރަން ހުރި ދަތުރުތައް ކެންސަލްކޮށްފައެވެ. އަދި މާޗު 2 ގެ ނިޔަލަށް ލެބަނަން، ސީރިއާ، އިރާގު، އީރާން އަދި އުރުދުންގެ ދަތުރުތައް ވެސް ވަނީ މެދުކަނޑާލާފަ އެވެ.

ގަތަރު އެއާވޭޒް: ގަތަރުގެ ވައިގެ ސަރަހައްދު ބަންދުކުރުމާ ގުޅިގެން، އެ އެއާލައިނުން ދޯހާއަށް ކުރާ އަދި ދޯހާއިން ފުރާ ހުރިހާ ދަތުރުތަކެއް ވަގުތީގޮތުން ވަނީ ހުއްޓާލާފަ އެވެ.

ޖަޕާން އެއާލައިންސް: ޓޯކިޔޯގެ ހަނެދާ އެއާޕޯޓުން ދޯހާއަށް ހޮނިހިރު ދުވަހު ކުރަން އޮތް ދަތުރާއި، މާޗު 1 ގައި އެނބުރި އައުމަށް އޮތް ފްލައިޓް ވަނީ ކެންސަލްކޮށްފަ އެވެ.

ވާޖިން އެޓްލާންޓިކް: އިރާގުގެ ވައިގެ ސަރަހައްދު ބޭނުންކުރުން ހުއްޓާލުމާ ގުޅިގެން، ހޮނިހިރު ދުވަހު ލަންޑަން ހީތުރޯއިން ދުބާއީއަށް ކުރަން އޮތް ދަތުރު ވަނީ ކެންސަލްކޮށްފައެވެ.

އެހެނިހެން އެއާލައިންތައް: ސްޕެއިންގެ އިބީރިއާ އެކްސްޕްރެސް އިން ތެލް އަވީވްގެ ދަތުރުތައް ކެންސަލްކޮށްފައިވާއިރު، ނޯވީޖިއަން އެއާ އިން ވަނީ ދުބާއީގެ ދަތުރުތައް ހުއްޓާލާފައެވެ. ޕޮލެންޑްގެ ލޮޓް އެއާލައިންސްގެ ފްލައިޓެއް ދުބާއީއަށް ދަނިކޮށް އަނބުރާ ވާރްސޯއަށް ވަނީ ގޮސްފަ އެވެ. އަދި އިންޑިގޯ އެއާލައިނުން ބުނީ ސަރަހައްދީ މަސްރަޙު ވަރަށް ގާތުން ބަލަމުންދާ ކަމަށެވެ.

މި ބަދަލުތައް ގެންނަން ޖެހުނީ މެދުއިރުމަތީގައި ހަނގުރާމައިގެ ހުޅުގަނޑު ފުޅާވެ، ވައިގެ މަގުން ދަތުރުފަތުރު ކުރުމަށް ނުރައްކާތަކެއް ކުރިމަތިވެފައިވާތީ ކަމަށް އެ އެއާލައިންތަކުން ބުނެ އެވެ.