ސަރަހައްދީ ހަމަނުޖެހުންތަކާ ގުޅިގެން ގަތަރު އެއާވޭސްގެ ދަތުރުތައް މެދުކަނޑާލައިފި

އިސްރާއީލުން އީރާނަށް ދެމުންދާ ހަމަލާތަކާ ގުޅިގެން މެދުއިރުމަތީގެ މަސްރަހު ގޯސްވެ، ގަތަރުގެ ވައިގެ ސަރަހައްދު ބަންދުކުރުމަށް ނިންމުމާ ގުޅިގެން، ގަތަރު އެއާވޭސްގެ ހުރިހާ ދަތުރުތަކެއް ވަގުތީ ގޮތުން މެދުކަނޑާލައިފި އެވެ.

ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، އިސްރާއީލުން އީރާނުގެ ވެރިރަށް ތެހެރާނަށް އަމާޒުކޮށް ވަރުގަދަ ހަމަލާތަކެއް ދޭން ފެށުމާއެކު، ސަރަހައްދީ ސަލާމަތާއި ރައްކާތެރިކަމަށްޓަކައި ގަތަރުގެ ވައިގެ ސަރަހައްދު މިހާރު ވަނީ ބަންދުކޮށްފަ އެވެ.

މި ދަނޑިވަޅުގައި، މެދުއިރުމަތީގެ ގިނަ ގައުމުތަކަކުން ދަނީ އެ ސަރަހައްދުގެ ވައިގެ ދަތުރުފަތުރުގެ ސަލާމަތީ ކަންކަމަށް ވަރަށް ބޮޑަށް ސަމާލުކަން ދެމުންނެވެ. އިސްރާއީލާއި އެމެރިކާ ގުޅިގެން އީރާނަށް ދެމުންދާ ހަމަލާތަކާ ގުޅިގެން މުޅި ސަރަހައްދުގެ ހަމަޖެހުން ވަނީ ގެއްލިފަ އެވެ.

މި ހަމަލާތަކާ ގުޅިގެން އެ ސަރަަހައްދުތަކުގެ ގައުމުތަކުގެ އެހެން އެއާލައިންތަކުން ވެސް ދަތުރުތައް މެދުކަނޑާލާނެކަން ބެލެވެ އެވެ.