ގާތްގަނޑަކަށް ހަ އަހަރު ދުވަހުގެ މެދުކެނޑުމަކަށްފަހު، މުދައްރިސުންގެ "ސްޓެޕް ޕްރޮމޯޝަން" އަލުން ދޭން ފަށާފައިވާކަން އެޑިއުކޭޝަން މިނިސްޓްރީން ހާމަކޮށްފި އެވެ.
މިނިސްޓްރީގެ އޮފިޝަލަކު މައުލޫމާތު ދެއްވި ގޮތުގައި، ޓީޗަރުންގެ ވަޒީފާގެ ކުރިއެރުން ދިނުން 2019 ވަނަ އަހަރުން ފެށިގެން މަޑުޖެހިފައި އޮތުމަށްފަހު، ރަސްމީކޮށް މި ޕްރޮމޯޝަން މެދުކަނޑާލާފައިވަނީ 2020 ވަނަ އަހަރުގެ ތެރޭގަ އެވެ.
އެޑިއުކޭޝަން މިނިސްޓަރު ޑރ. އިސްމާއީލް ޝަފީއުގެ އިސްނެންގެވުމާއި ކުރެއްވި ބުރަ މަސައްކަތްޕުޅުގެ ދަށުން، 2022 ވަނަ އަހަރުން ފެށިގެން ނުލިބި ހުރި ސްޓެޕް ޕްރޮމޯޝަންތަކަށް ބޭނުންވާ މާލީ އެހީތެރިކަން މިހާރު ވަނީ އެއްކޮށް ހަމަޖައްސާފަ އެވެ. މިނިސްޓްރީގެ އޮފިޝަލް ވިދާޅުވި ގޮތުގައި، ސްކޫލްތަކުން ފުރިހަމަކުރަންޖެހޭ އިދާރީ ލިޔެކިޔުންތައް ނިންމައި މިނިސްޓްރީއަށް ހުށަހަޅާ ތަރުތީބުން، ޕްރޮމޯޝަން ހައްގުވާ ތާރީހުން ފެށިގެން ލިބެންޖެހޭ ހުރިހާ ފައިސާއެއް މިހާރު ދަނީ އެއްފަހަރާ މުދައްރިސުންނަށް ޖަމާކޮށްދެމުންނެވެ.
"ސްޓެޕް ޕްރޮމޯޝަން" އަކީ 'ނޭޝަނަލް ޕްރޮފެޝަނަލް ސްޓޭންޑަޑްސް' އަށް ބިނާކޮށް މުދައްރިސުންނަށް ވަޒީފާގެ ކުރިއެރުން ދިނުމަށް ކަނޑައެޅިފައިވާ 'ކެރިއާ ޕްރޮގްރެޝަން' ނިޒާމެކެވެ. މި ނިޒާމުގެ ދަށުން މުދައްރިސުންގެ މަސައްކަތުގެ ފެންވަރާއި، ހޯދާ ފަންނީ ތަމްރީނުތަކަށް ބަލައި ގްރެޖުއޭޓް، ޕްރޮފިޝަންޓް، އެކޮމްޕްލިޝްޑް އަދި ޑިސްޓިންގްޝިޝްޑް ފަންތިއަށް ވަޒީފާގެ ކުރިއެރުން ދެވޭނެ އެވެ.
ރާއްޖޭގެ އެކި ކަންކޮޅުތަކުގައި 9،990 އަށްވުރެ ގިނަ ދިވެހި އަދި ބިދޭސީ މުދައްރިސުން މަސައްކަތް ކުރަމުންދާއިރު، ސަރުކާރުގެ މި ނިންމުމުގެ ސަބަބުން ގިނަ އަދަދެއްގެ މުދައްރިސުންނަށް މާލީ ގޮތުންނާއި ވަޒީފާގެ ކުރިއެރުމުގެ ގޮތުން ބޮޑެތި ފައިދާތަކެއް ކުރާނެ އެވެ.
