ރޭ ދަންވަރުއްސުރެ ބޯޑަރު ހުރަސްކޮށް އަފްޣާނިސްތާނާއި ޕާކިސްތާނާއި ދެމެދުގައި ކުރަމުންދާ ހަނގުރާމައިގައި މިހާތަނަށް އަފްޣާނިސްތާނުގެ 133 ސިފައިން މަރާލައި 200 އަށް ވުރެ ގިނަ މީހުން ޒަޚަމް ކޮށްލާފައިވާ ކަމަށް ޕާކިސްތާނުން ބުނެފިއެވެ. މީގެ އިތުރުން ޠާލިބާނު ސިފައިންގެ 27 ޕޯސްޓެއް ހަލާކުކޮށް، އިތުރު 7 ޕޯސްޓެއް އަތުލައިގަނެފައިވާ ކަމަށް ވެސް ޕާކިސްތާނުން ބުނެއެވެ.
ޕާކިސްތާނުން ބުނީ އެ މީހުން އަފްޣާނިސްތާނަށް ދެމުން ގެންދަނީ ރައްދުގައި ފެށި ޙަމަލާތަކެއް ކަމަށާއި، އެގޮތުން މިހާރު އެންމެ ބޮޑަށް ފޯކަސް ކުރަނީ ވެރިރަށް ކާބުލް އާއި ކަންދަހާރުގެ އިތުރުން ޕަކްޓިއާ ގައި ޤާއިމް ކޮށްފައިވާ އަފްޣާނިސްތާނު ސިފައިންގެ މަރުކަޒުތައް ގޮއްވާލުން ކަމަށެވެ.
Advertisement
މިހާތަނަށް ޠާލިބާނުގެ 36 ޓޭންކަރާއި ގިނަ ޢަދަދެއްގެ އުޅަނދާއި ހަތިޔާރުތައް ނައްތާލާފައިވާ ކަމަށް ވެސް ޕާކިސްތާނުން ބުނެއެވެ.
އަފްޣާނިސްތާނުގެ ޚަބަރުތައް ބުނާ ގޮތުގައި އިސްވެ ޙަމަލާ ދިނީ ޕާކިސްތާނުންނެވެ. އަދި ޕާކިސްތާނުގެ 10 ވަރަކަށް މީހުން ޠާލިބާންގެ ރައްދު ޙަމަލާގައި މަރައިލެވުނު ކަމަށެވެ. ނަމަވެސް ޕާކިސްތާނުން އެކަން ދޮގު ކުރެއެވެ. އިސްލާމް އާބާދުން ވަނީ ޠާލިބާނާއި ދެކޮޅަށް ހަނގުރާމަ އިޢުލާން ކޮށްފައެވެ.
ޕާކިސްތާނުން ބުނީ ޠާލިބާނުން އެއްވެސް ބާރެއް ނެތީސް ޕާކިސްތާނަށް ޙަމަލާ ދިނީ ކަމަށާއި، ޠާލިބާންގެ ޙަމަލާއިން ޕާކިސްތާނުގެ ދެސިފައިން މަރުވި ކަމަށެވެ.
