ސަރުކާރުން ކުރިއަށްގެންދާ ތަރައްގީގެ މަޝްރޫޢުތަކަށް އެއްބާރުލުން ދެއްވުމަށްޓަކައި، ކުރިއަށް އޮތް އިންތިހާބުގައި "ދޫންޏަށް" ވޯޓު ދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ ކިބައިން އިލްތިމާސް ކުރައްވައިފި އެވެ.
ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ ސަރުކާރު ހިންގާ ޕީއެންސީން އާޓިފިޝަލް ބީޗުގައި ބޭއްވި ހާއްސަ ބައްދަލުވުމެއްގައި ވާހަކަފުޅު ދައްކަވަމުންނެވެ. މި ބައްދަލުވުމުގައި އެމަނިކުފާނު ވިދާޅުވީ، ރައްޔިތުން އެދޭފަދަ ހަލުވި ތަރައްގީއެއް ގައުމަށް ގެނައުމަށްޓަކައި، ސަރުކާރުގެ ސިޔާސަތުތައް ތަންފީޒުކުރުމުގައި އެއްބާރުލުން ދޭނެ މަންދޫބުން އިންތިހާބު ކުރުމަކީ ނުހަނު މުހިންމު ކަމެއް ކަމަށެވެ.
ރައީސް އިތުރަށް ވިދާޅުވީ، ސަރުކާރުގެ އަމާޒަކީ ރައްޔިތުންނަށް ވެފައިވާ ވައުދުތައް ފުރިހަމައަށް ފުއްދައިދިނުން ކަމަށާއި، އެ މަސައްކަތުގައި މަޖިލީހާއި އެހެނިހެން ދާއިރާތަކުން ސަރުކާރަށް ތާއީދުކުރާ ފަރާތްތައް ތިބުމަކީ މަޝްރޫއުތައް ހުއްޓުމެއްނެތި ކުރިއަށް ގެންދިއުމަށް ލިބޭނެ ވަރަށް ބޮޑު ބާރެއް ކަމަށެވެ. އެހެންކަމުން، ސަރުކާރުގެ ކެންޑިޑޭޓުންނަށް ނުވަތަ "ދޫންޏަށް" ވޯޓު ދެއްވައިގެން ގައުމީ ތަރައްގީގައި ބައިވެރިވުމަށް އެމަނިކުފާނު ވަނީ ހުރިހާ ރައްޔިތުންގެ ކިބައިން އެދިވަޑައިގެންފަ އެވެ.
މި ބައްދަލުވުމުގައި ސަރުކާރުގެ އިސްވެރިންނާއި ސަރުކާރަށް ތާއީދުކުރައްވާ ގިނަ އަދަދެއްގެ ސަޕޯޓަރުން ބައިވެރިވެފައިވެ އެވެ.
