ހުޅުމާލެ ތިންވަނަ ފިޔަވަހީގައި އެފޯޑަބަލް ހޯމް އޯނަޝިޕް މޮޑެލްގެ ދަށުން 1،000 ހައުސިން ޔުނިޓް ތަރައްގީކޮށްދޭނެ ބަޔަކު ހޯދުމަށް ހައުސިން މިނިސްޓްރީން މިއަދު އިއުލާނުކޮށްފި އެވެ.
މި މަޝްރޫއަކީ މިސަރުކާރުން އެކި ފަންތިތަކަށް އަތްފޯރާ އަގުގައި ބޯހިޔާވަހިކަން ފޯރުކޮށްދިނުމަށް ގެންގުޅުއްވާ ތަސައްވުރުގެ ދަށުން ކުރިއަށްގެންދާ މަޝްރޫއެއް ކަމަށް އެ މިނިސްޓްރީން ބުނެއެވެ. ޑިޒައިން އެންޑް ބިލްޑް އުސޫލުން ކުރިއަށްގެންދާ މި މަޝްރޫއު ބިނާކުރެވިފައިވަނީ "އެފޯޑަބަލް ހޯމް އޯނަޝިޕް" މޮޑެލްގެ މައްޗަށެވެ. މިއީ ބޯހިޔާވަހިކަމުގެ އަސާސީ މިންގަނޑަށްވުރެ މަތީ ފަންތިއެއްގެ ކެޓަގަރީއެކެވެ.
މި މަޝްރޫއުގެ އެންމެ ހާއްސަ އެއް ކަމަކީ، މިއީ ހަމައެކަނި 100 އިންސައްތަ ދިވެހި ހިއްސާ އޮންނަ ކުންފުނިތަކަށް ހުޅުވާލާފައިވާ ފުރުސަތަކަށް ވުމެވެ. ހައުސިން މިނިސްޓްރީން ހާމަކުރި ގޮތުގައި، ދިވެހި ކުންފުނިތަކަށް މި ފުރުސަތު ހާއްސަކުރީ ގައުމުގެ ތަރައްގީގެ ބޮޑެތި މަޝްރޫއުތަކުގައި ދިވެހި ކުންފުނިތަކުގެ ހިއްސާ އިތުރުކޮށް، އެ ކުންފުނިތަކަށް ކުރިއެރުމުގެ ފުރުސަތު ފަހިކޮށްދިނުމުގެ މަގުސަދުގައެވެ.
ސަރުކާރުގެ އަމާޒަކީ ހަމައެކަނި ވަކި ފަންތިއަކަށް ބޯހިޔާވަހިކަން ދިނުމުގެ ބަދަލުގައި، ހުރިހާ ފަންތިއެއްގެ ރައްޔިތުންނަށްވެސް އެކަށީގެންވާ ފުރުސަތުތައް ހޯދައިދިނުމެވެ.
މި މަޝްރޫއު ކުރިއަށްގެންދަން ޝައުގުވެރިވާ ދިވެހި ކުންފުނިތަކުން ޕްރޮޕޯސަލް ހުށަހެޅުމުގެ ސުންގަޑިއަކީ މާރިޗު މަހުގެ 23 ވަނަ ދުވަހުގެ މެންދުރު 13:00 އެވެ. ހުޅުމާލެ ފޭސް 3 އަކީ ބޯހިޔާވަހިކަމުގެ ގިނަ މަޝްރޫއުތަކެއް ހިންގުމަށް ސަރުކާރުން ކަނޑައަޅާފައިވާ ސަރަހައްދެކެވެ.
"އެންމެނަށް ބޯހިޔާވަހިކަން" ސިޔާސަތުގެ ދަށުން މާލެ ގްރޭޓާ މާލެ އަދި ރަސްމާލޭގައި 7،900 ހައުސިން ޔުނިޓު އަދި ފުރަތަމަ ފިޔަވަހީގެ ދަށުން 15،000 ގޯތި ދިނުމަށް ސަރުކާރުން ވަނީ ނިންމާފަ އެވެ. މި ފުލެޓުތަކާއި ގޯތިތަކަށް އެދި ހުށަހެޅުމުގެ ފުރުސަތު ސަރުކާރުން މިދިޔަ މަހު ހުޅުވާލާފައިވާއިރު، މުއްދަތު ހަމަވާނީ އަންނަ އޭޕްރީލް މަހުގެ 30 އަށެވެ.
