ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ބޭއްވުމަށް ގާނޫނަށް ގެންނަން ހުށަހަޅާފައިވާ ބަދަލަށް އިދިކޮޅު ފަރާތްތަކުން ދެކޮޅު ހަދަނީ، އިންތިހާބާ ދިމާކޮށް ރައްޔިތުންނަށް އޮޅުވާލުމަށް ހިންގާ "މަޝްރޫއުތަކުގެ ބިންގާ އެޅުމުގެ" ސަގާފަތް ކުރިއަށް ނުގެންދެވޭނެތީ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ޕީއެންސީން ބޭއްވި ތަރާވީސް ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، މީގެ ކުރިން އަމަލުކުރަމުން އައި ގޮތަކީ އިންތިހާބާ ދިމާކޮށް ގިނަ މަޝްރޫއުތަކެއްގެ ބިންގާ އެޅުމަށްފަހު، އިންތިހާބު ނިމުމުން އެ މަޝްރޫއުތަކުގެ އެއްވެސް މަސައްކަތެއް ނުފެނުން ކަމަށެވެ. އިދިކޮޅު ފަރާތްތަކުން މި އުސޫލުގެ ތެރެއިން ކަންކަން ކުރަން ބޭނުންވާތީ، ދެ އިންތިހާބު އެއްދުވަހެއްގައި ބޭއްވުމަށް ބޭނުންނުވަނީ ކަމަށް ރައީސް ތުހުމަތު ކުރެއްވިއެވެ.
ދެ އިންތިހާބު އެއްދުވަހެއްގައި ބޭއްވުމަކީ ރައްޔިތުންގެ ބާރުވެރިކަން އިތުރުވެ، ނިންމުންތައް ނިންމުމަށް ލިބޭ ބޮޑު އެހީތެރިކަމެއް ކަމަށް ރައީސް ފާހަގަކުރައްވައި ދެ ނުކުތާއެއް ފާހަގަކުރެއްވި އެވެ. އެއީ؛
- ވޯޓުލާ ނިސްބަތް އިތުރުކުރުން: މިހާރު އޮންނަ ގޮތުން ރިޔާސީ އިންތިޚާބާ އަޅާބަލާއިރު ރައްޔިތުންގެ މަޖިލީހުގެ އިންތިޚާބުގައި ވޯޓުލާ މީހުންގެ އިންސައްތަ މަދުކަން ރައީސް ފާހަގަކުރެއްވިއެވެ. ދެ އިންތިޚާބު އެއްކޮށްލުމުން މިކަމަށް ހައްލެއް ލިބޭނެ ކަމަށް އެމަނިކުފާނު ވިދާޅުވިއެވެ.
- ޑިމޮކްރަސީގެ ހަމަތައް: ވީހާވެސް ގިނަ ރައްޔިތުން ނުކުމެ ވޯޓުލުމަކީ ޑިމޮކްރަސީގެ ހަމަތަކުން ބަލާއިރު އެންމެ ރަނގަޅު ގޮތް ކަމަށާއި، އެއީ ގައުމުގެ ކުރިމަގަށް އެންމެ ފައިދާހުރި ގޮތް ކަމަށް ރައީސް ވިދާޅުވިއެވެ.
މީގެ އިތުރުން، ރައީސަކު އިންތިހާބުވުމަށްފަހު އެއިރެއްގައި އޮންނަ މަޖިލީހުން ބަޖެޓް ފާސްކުރުމުގައި ހުރަސްތައް ކުރިމަތިކުރާކަން ފާހަގަކުރައްވައި، ރައީސް ވަނީ އޭޕްރީލް 4 ވަނަ ދުވަހު ބޭއްވުމަށް ހަމަޖެހިފައިވާ ވޯޓުގައި "އާނއެކޭ" ޖެއްސެވުމަށް ހުރިހާ ރައްޔިތުންނަށް އިލްތިމާސް ކުރައްވާފަ އެވެ.
