ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދޮޅު އަހަރު ދުވަހުގެ ތެރޭގައި ރާއްޖޭގެ ހުރިހާ ރަށަކަށް ވަޑައިގަތީ އެއްވެސް އިންތިހާބެއް ބޯމަތީގައި އޮވެގެން ނޫން ކަމަށް މަހިބަދޫ ދާއިރާގެ އިއްޒަތްތެރި މެންބަރު އަހްމަދު ތާރިގް (ޓޮމް) ވިދާޅުވެއްޖެ އެވެ.
ރައީސް ޑރ. މުއިއްޒު ރަށްރަށަށް ކުރައްވާ ދަތުރުފުޅުތަކާ ގުޅޭގޮތުން ތާރިގް ވިދާޅުވީ، އެމަނިކުފާނު ރަށްރަށަށް ވަޑައިގެން ރިޔާސީ އިންތިހާބުގައި ވެވަޑައިގެންނެވި ވައުދުތަކަށް އަލިއަޅުވާލައްވައި، ރައްޔިތުންގެ ހާލު ބައްލަވައި ކަންކަމަށް ހައްލު ހޯއްދަވައިދެއްވަމުން ގެންދަވާ ކަމަށެވެ. އަދި އިންތިހާބެއް ކުރިމަތީގައި އޮތީމާ ނޫނީ ރަށްރަށަށް ރައީސުން ވަޑައިނުގަންނަވާނެ ކަމަށް ދެކޭ ވިސްނުމަކީ "ބޯދާ" ވިސްނުމެއް ކަމަށްވެސް އޭނާ ވިދާޅުވިއެވެ
އާޓިފިޝަލް ބީޗުގައި މިހާރު ކުރިއަށްދާ ޕީއެންސީގެ ތަރާވީސް ހަރަކާތުގައި ވާހަކަފުޅުދައްކަވަމުން ތާރިގް ފާހަގަކުރެއްވި ގޮތުގައި، ރިޔާސީ އިންތިހާބު ނިމި ހަ މަސްދުވަސް ފަހުން ރައްޔިތުންގެ މަޖިލީހުގެ އިންތިހާބު އޮންނާތީ، ވެރިކަން ބަދަލުވުމަށްފަހު ލިބޭ އެ ކުރު މުއްދަތުގެ ތެރޭގައި އާ ސަރުކާރުގެ ކެބިނެޓް މިނިސްޓަރުންނަށް ރުހުން ނުދީ ޖެއްސުން ކުރަމުންދާ މަންޒަރު ފެންނަމުންދާ ކަމަށެވެ. މިއީ ގައުމުގެ ހިންގުމަށް އެޅޭ ހުރަހެއްގެ ގޮތުގައި އޭނާ ސިފަކުރެއްވި އެވެ..
މީގެ އިތުރުން، އިންތިހާބުތައް އެއްދުވަހެއްގައި ބޭއްވުމާ ގުޅޭގޮތުން ވާހަކަދައްކަވަމުން ތާރިގް ވިދާޅުވީ، ކުރީގެ ރައީސް މުހައްމަދު ނަޝީދު ކުރިން ވިދާޅުވެފައިވަނީ އެއްދުވަހެއްގައި ދެ އިންތިހާބު ބޭއްވުމަށް ކަމަށެވެ. ނަމަވެސް، މިހާރު ޕީއެންސީން އެ ވާހަކަ ދައްކާތީ ނަޝީދު އެކަމާ ދެކޮޅު ހައްދަވާފައިވާ ކަމަށާއި، އެއީ ޕީއެންސީގެ ފިކުރުން އެކަމަށް ތާއީދުކުރާތީ ކަމަށް ތާރިގް ފާހަގަކުރެއްވި އެވެ.
މި ހަރަކާތުގައި ތާރިގް ވަނީ ސަރުކާރުގެ ސިޔާސަތުތަކަށް ތާއީދުކޮށް، ރައްޔިތުންގެ މަޖިލީހުގެ މެޖޯރިޓީ ސަރުކާރަށް ލިބުމުގެ މުހިންމުކަމުގެ މައްޗަށްވެސް އަލިއަޅުވާލައްވާފަ އެވެ.
