މި ބަރަކާތްތެރި ރަމަޟާން މަހުވެސް އިދިކޮޅު ފަރާތްތަކުން ފެނިގެންދަނީ ހެއްދެވިހާ ދޮގަކާއިގެން ރައްޔިތުންގެ ގާތަށް ދާތަން ކަމަށް ވިދާޅުވެ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް، އިދިކޮޅު ފަރާތްތަކަށް ވަރަށް ބޮޑަށް ފާޑުވިދާޅުވެއްޖެ އެވެ.
އާޓިފިޝަލް ބީޗުގައި މިވަގުތު ކުރިއަށްދާ ޕީއެންސީގެ ތަރާވީސް ހަރަކާތުގައި ވާހަކަފުޅުދައްކަވަމުން ޝިޔާމް ވިދާޅުވީ ސިޔާސީ މަގްސަދުތައް ހާސިލްކުރުމަށްޓަކައި އިދިކޮޅުން ކޮންމެފަދަ ވާހަކައެއްވެސް ދައްކަފާނެ ކަމަށާއި ސަރުކާރުން އުޅެނީ އިންތިހުބުތައް އެއްކޮށްލާކަށް ނޫން ކަމަށެވެ. ރައްޔިތުންގެ ވޯޓެއް ނަގަން އުޅެނީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު ފަދަ ބޮޑު ދެ އިންތިހާބު އެއް ދުވަހެއްގައި ބޭއްވުމަށް ކަމަށާއި އޭގެ ބޭނުމަކީ ހަރަދު ކުޑަކުރުމާއި ވޯޓުލާ މީހުންގެ ނިސްބަތް އިތުރުކުރުން ކަމަށް ޝިޔާމް ވިދާޅުވި އެވެ.
"ދެ ތާރީހެއްގައި އިންތިޚާބު ބާއްވާނަމަ އިންތިހާބަކަށް ގާތްގަނޑަކަށް 150 މިލިއަން ރުފިޔާ ހަރަދުވޭ. މީގެ އިތުރުން ރައްޔިތުންގެ ޖީބުން ކުރަންޖެހޭ ހަރަދުތައްވެސް އިތުރުވޭ،" ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވީ ރިޔާސީ އިންތިހާބާ އަޅާބަލާއިރު މަޖިލިސް އިންތިހާބުގައި ވޯޓުލާން ނިކުންނަ މީހުން މަދު ނަމަވެސް، ދެ އިންތިހާބު އެކީގައި ބޭއްވުމުން ވޯޓުލާ މީހުންގެ ނިސްބަތް އިތުރުވާނެ ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާ ނިންމެވުންތަކަށް އަލިއަޅުއްވާލައްވަމުން ޝިޔާމް ވިދާޅުވީ، ސިގިރޭޓާއި ވޭޕް މަނާކުރުމާއި ޑޮލަރު މާރުކުރުމުގެ ނިންމެވުންތަކާ ވަރަށް ގިނަ ވިޔަފާރިވެރިން ދެކޮޅު ހެދި ނަމަވެސް، ރައީސް އެ ނިންމެވުންތައް ނިންމެވީ ގައުމަށާއި ރައްޔިތުންނަށް އެންމެ ފައިދާހުރި ގޮތަކީ އެއީ ކަމަށްވާތީ ކަމަށެވެ.
ގައުމުގެ އިގްތިސާދީ ހާލަތާ ގުޅޭގޮތުން ޝިޔާމް ވިދާޅުވީ، މި ސަރުކާރުން ވެރިކަމާ ހަވާލުވިއިރު އިދިކޮޅުން ބުނަމުންދިޔައީ ގައުމު ބަގުރޫޓުވަނީ ކަމަށެވެ. ނަމަވެސް ރައީސް މުޢިއްޒު ގެންދަވަނީ ގައުމު ބަގުރޫޓުވިޔަ ނުދީ، ރިޔާސީ ކެމްޕޭނުގައި ވީ ވައުދުތަކާ އެއްގޮތަށް ގައުމު ތަރައްގީ ކުރައްވަމުން ކަމަށް ޝިޔާމް ވިދާޅުވިއެވެ.
