ދިވެހި ފުލުހުންގެ ހިދުމަތުގައި 32 އަހަރަށްވުރެ ދިގު މުއްދަތެއްގައި އިހްލާސްތެރި ހިދުމަތްތަކެއް ކުރެއްވުމަށްފަހު، ރިޓަޔާ ކުރެއްވި ކޮމިޝަނަރު އޮފް ޕޮލިސް އިސްމާއީލް ނަވީންގެ ހިދުމަތުގެ އަގުވަޒަންކުރުމަށްޓަކައި ހާއްސަ ރަސްމިއްޔާތެއް ބާއްވައިފި އެވެ.
މިއަހަރުގެ ފެބްރުއަރީ މަހުގެ 18 ވަނަ ދުވަހު ފުލުހުންގެ ހިދުމަތުން ރިޓަޔާ ކުރެއްވި ނަވީންގެ ޝަރަފުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާނެވެ. އިސްކަންދަރު ބިލްޑިންގްގައި ބޭއްވުނު މި ރަސްމިއްޔާތުގައި ފުލުހުންގެ އިދާރާ ހިންގެވުމާ ހަވާލުވެ ހުންނެވި ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީގެ އިތުރުން، ފުލުހުންގެ އިސް އޮފިސަރުންނާއި، އެކި ރޭންކުތަކުގެ ފުލުހުން އަދި މުއައްސަސާގެ މަދަނީ މުވައްޒަފުން ބައިވެރިވެވަޑައިގެންނެވި އެވެ.
މި ރަސްމިއްޔާތުގައި ނަވީންގެ ދިގު ކެރިއަރުގައި ދެއްކެވި ފާހަގަކޮށްލެވޭ ލީޑަރޝިޕާއި، މުޖުތަމައުގެ ސަލާމަތާއި ރައްކާތެރިކަމަށްޓަކައި ކުރެއްވި މަސައްކަތްތަކުގެ ހަނދާންތައް އާކޮށް، އޭނާގެ ހިދުމަތުގެ އަގު ވަނީ ވަރަށް މަތީ ދަރަޖައަކަށް ވަޒަންކޮށްފަ އެވެ. ދިވެހި ފުލުހުންގެ ހިދުމަތުގެ ފަރާތުން ނަވީން ކުރެއްވި އިހްލާސްތެރި ހިދުމަތަށްޓަކައި ޝުކުރު އަދާކޮށް، އޭނާގެ ކުރިމަގަށް ކާމިޔާބީއަށް އެދިފައިވެ އެވެ.
ރަސްމިއްޔާތުގައި ވާހަކަ ދައްކަވަމުން ނަވީން ވިދާޅުވީ، 7 ޖުލައި 1994 ގައި ފުލުހުންގެ ހިދުމަތާ ގުޅިވަޑައިގެންނެވި ދުވަހުން ފެށިގެން މިއަދާ ހަމައަށްވެސް މަސައްކަތް ކުރެއްވީ ފުލުހުންގެ ބެޖަށް ފުރިހަމައަށް އިހްތިރާމްކޮށް، މުއައްސަސާއަށް އޮތް އިތުބާރު ދަމަހައްޓައި، ގައުމަށް އޮތް ލޯތްބާއި ގަދަރާ އެކުގައި ކަމަށެވެ. އަދި ގައުމަށް ޚިދުމަތް ކުރުމުގެ ފުރުސަތު ލިބިވަޑައިގެންނެވި ކަމަށްޓަކައި ވަރަށް ބޮޑަށް ޝުކުރުވެރިވާކަން ނަވީން ފާހަގަކުރެއްވި އެވެ.
ނަވީންގެ 32 އަހަރުގެ ދިގު ހިދުމަތުގެ މުއްދަތުގައި އޭނާ ވަނީ ފުލުހުންގެ މުއައްސަސާ ހިންގުމުގެ އެކި ދާއިރާތަކުގައި އިސް ދައުރެއް އަދާކުރައްވައި، މުއައްސަސާގެ ކުރިއެރުމަށް މުހިންމު މަސައްކަތްތަކެއް ކޮށްދެއްވާފަ އެވެ. ނަވީން ރިޓަޔާ ކުރެއްވުމާ ގުޅިގެން، އޭނާ ކުރިން އަދާކުރައްވަމުން ގެންދެވި މަސްއޫލިއްޔާތުތައް މިހާރު ވަގުތީގޮތުން ހަވާލުކުރައްވާފައިވަނީ ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީއާ އެވެ.
