ރާއްޖޭގެ ބޭރު ފައިސާގެ ބާޒާރުގައި ޑޮލަރުގެ ރޭޓް ވަކި ހަމައެއްގައި ހިފެހެއްޓުމުގެ ބަދަލުގައި، ބާޒާރުގެ އޮއިވަރަށް ދޫކޮށްލުމަކީ (ފްލޯޓް ކުރުމަކީ) ރާއްޖޭގެ އިގްތިސާދަށް އެންމެ ފައިދާހުރި ގޮތް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެކްސް މެދުވެރިކޮށް މިއަދު އާންމުކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ދިވެހި ރުފިޔާގެ އަގު ބޭރު ފައިސާއާ އަޅާބަލާއިރު ވަކި ރޭޓެއްގައި ހިފެހެއްޓުމަށް މަސައްކަތް ކުރުމަކީ އިގްތިސާދީ ގޮތުން ބޮޑެތި ގޮންޖެހުންތަކެއް ކުރިމަތިވާ ކަމެއް ކަމަށެވެ. އެމަނިކުފާނު ފާހަގަކުރެއްވި ގޮތުގައި، އެކްސްޗޭންޖް ރޭޓް މުޅިން ފްލޯޓްކޮށްލުމުން ބާޒާރުގައި ޑޮލަރުގެ ސަޕްލައި އާއި ޑިމާންޑް އަމިއްލައަށް ބައްޓަންވެ، ކަޅު ބާޒާރު ނެތިގެންދާނެ އެވެ.
ރާއްޖޭގެ ރަސްމީ ޑޮލަރު ރޭޓަކީ 15.42 ރުފިޔާ ކަމުގައި ވީނަމަވެސް، ކަޅު ބާޒާރުގައި ޑޮލަރުގެ އަގު އާންމުކޮށް އުޅެނީ 20 ރުފިޔާއަށްވުރެ މަތީގަ އެވެ.
ޑޮލަރުގެ ރޭޓު ކަޅު ބާޒާރުގައި މަތީގައި އުޅުނު ކަމުގައި ވިޔަސް، ރާއްޖެއިން ބޭރަށް ދަތުރުކުރާ ދިވެހިންނަށް ފަސޭހައިން ޑޮލަރު ލިބޭނެ އިންތިޒާމުތަކެއް ސަރުކާރުން ވަނީ ގާއިމުކޮށްފައެވެ. ވަކިން ހާއްސަކޮށް ބޭސްފަރުވާއަށް ރާއްޖެއިން ބޭރަށްދާ ފަރާތްތަކަށް ލުއިފަސޭހަ ގޮތްތަކެއް ވަނީ ހަމަޖެހިފައެވެ.
އެގޮތުން، ބޭސްފަރުވާއަށް ރާއްޖެއިން ބޭރަށްދާ ކޮންމެ މީހަކަށް ލިބޭ 500 ޑޮލަރާއެކު، އެންސްޕާގެ އެހީ ލިބިގެންދާ މީހަކަށް ނަމަ އެންސްޕާއިން ކަނޑައަޅާ އަދަދަކަށް (ގިނަވެގެން 2،000 ޑޮލަރު) ބޭންކު މެދުވެރިކޮށް ލިބޭނެއެވެ. އަދި އާސަންދަ ނުވަތަ އެންސްޕާގެ އެހީއާ ނުލައި އަމިއްލަ ހަރަދުގައި ބޭސްފަރުވާއަށްދާ މީހެއް ނަމަ 1،000 ޑޮލަރު ލިބޭނެ އިންތިޒާމު ވަނީ ހަމަޖައްސައިފައެވެ.
މީގެއިތުރުން، ވިޔަފާރިތަކަށް ބޭންކް ރޭޓުގައި 30 އިންސައްތައާ ހަމައަށް ރާއްޖެއިން ބޭރަށް ޓީޓީ ފޮނުވުމުގެ މަގު ވަނީ ފަހިކޮށްދެވިފައެވެ. އަދި ޑެބިޓް ކާޑުތަކުން އޮންލައިން ޕްލެޓްފޯމްތަކުގައި 1,000 ޑޮލަރާ ހަމައަށް މުއާމަލާތް ކުރެވޭއިރު، ހޮޓެލް ބުކިންތަކާއި ޓިކެޓުތަކަށް 3,000 ޑޮލަރާ ހަމައަށް ބޭނުންކުރެވޭނެއެވެ. ހަމައެއާއެކު، ކްރެޑިޓް ކާޑުތަކުގެ ލިމިޓަށް ވެސް މި މަހުގެ އެއްވަނަ ދުވަހުން ފެށިގެން ވަނީ ބަދަލުތަކެއް ގެނެސް، އިތުރުކޮށްދީފައެވެ.
ރައީސް ނަޝީދު މިފަދަ އިރުޝާދެއް ދެއްވާފައި މިވަނީ ރާއްޖޭގެ މާލީ ހާލަތު ރަނގަޅުކުރުމަށް ސަރުކާރުން ގިނަ ފިޔަވަޅުތަކެއް އަޅަމުންދާ ދަނޑިވަޅެއްގައެވެ. އެމަނިކުފާނު ގަބޫލުފުޅުކުރައްވާ ގޮތުގައި އިގްތިސާދީ ހަމަޖެހުން ގާއިމުކުރެވޭނީ ބާޒާރުގެ ހަގީގީ އަގުތަކަށް ޖާގަދީގެންނެވެ.
