މައި ދެ އިންތިހާބު ކަމަށްވާ ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލުމާ ގުޅޭ ގޮތުން ނަގަން ނިންމާފައިވާ ރައްޔިތުންގެ ހިޔާލު ހޯދުމުގެ ވޯޓު ހުއްޓުވަން އެދި، ކޯޓަށް ހުށަހަޅާނެކަން އެމްޑީޕީން ހާމަކޮށްފިއެވެ.
ދެ އިންތިހާބު އެއްކޮށްލުމުގެ ބިލު ރައްޔިތުންގެ މަޖިލީހުން ފާސްކޮށްފައިވާއިރު އެ ބިލު ތަސްދީގުކުރެއްވުމަށް ރައްޔިތުންގެ ފެންނަ ނުފެންނަ ވޯޓެއް ނަގަން ރައީސުލްޖުމްހޫރިއްޔާގެ ގަރާރަކުން ވަނީ ފާސްކޮށްފަ އެވެ. އެ ގަރާރުގައިވާ ގޮތުން މި ރިފެރަންޑަމް ވޯޓު ނަގާނީ އަންނަ އޭޕްރީލް 4 ގައި ބާއްވާ ކައުންސިލް އިންތިހާބާ އެކުގަ އެވެ.
މައި ދެ އިންތިހާބު ކަމަށްވާ ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލުމާ ގުޅޭ ގޮތުން ނަގަން ނިންމާފައިވާ ރައްޔިތުންގެ ހިޔާލު ހޯދުމުގެ ވޯޓު ހުއްޓުވަން އެދި، ކޯޓަށް ހުށަހަޅާނެކަން އިދިކޮޅު އެމްޑީޕީން ހާމަކޮށްފިއެވެ.
މި ރިފެރަންޑަމް ވޯޓަކީ އަންނަ އޭޕްރީލް 4 ގައި ބާއްވާ ކައުންސިލް އިންތިހާބާ އެކު ބޭއްވުމަށް ރައީސުލްޖުމްހޫރިއްޔާގެ ގަރާރަކުން ކަނޑައަޅުއްވާފައިވާ ވޯޓެކެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް ވިދާޅުވިގޮތުގައި ދެ އިންތިހާބު އެއްކޮށްލާން ނަގާ ވޯޓަށް "ނޫނެކޭ" ބުނުމަށް އެ ޕާޓީގެ ގައުމީ މަޖިލީހުން މިހާރު ވަނީ ފާސްކޮށްފައެވެ. އަދި މިކަމާ ގުޅޭ މަސައްކަތްތައް ކުރުމަށް ހާއްސަ ޓާސްކްފޯހެއް އެކުލަވާލާފައިވާ ކަމަށްވެސް އޭނާ ވިދާޅުވިއެވެ.
ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ، ރައީސް ނެރުއްވި ގަރާރަކީ ގާނޫނުއަސާސީއަށް ގެނެވުނު ބަދަލާ ހިލާފު ގަރާރެއް ކަމަށެވެ. އެހެންކަމުން އެ ގަރާރު ބާތިލްކުރުމަށާއި، ވޯޓު ނެގުން ހުއްޓުވުމުގެ ވަގުތީ އަމުރަކަށް އެދި މިއަދު ކޯޓަށް ހުށަހަޅާނެ ކަމަށް އޭނާ ވިދާޅުވިއެވެ. މައުރޫފް ތުހުމަތު ކުރެއްވި ގޮތުގައި މި ވޯޓު ނަގަން ސަރުކާރުން ނިންމީ ރާއްޖޭގައި "ހުދުމުހުތާރު ވެރިކަމެއް ގާއިމުކުރުމަށްޓަކައި" ކަމަށެވެ.
ދެ އިންތިހާބު އެއްކޮށްލުމުގެ ބިލު ރައްޔިތުންގެ މަޖިލީހުން ފާސްކޮށްފައިވާއިރު، ރައީސް ޑރ. މުހައްމަދު މުއިއްޒު ވިދާޅުވެފައިވަނީ މި ބަދަލު ގެންނަން ނިންމެވީ ދައުލަތުގެ ހަރަދުތައް ކުޑަކުރުމުގެ މަގްސަދުގައި ކަމަށެވެ. ދެ އިންތިހާބު އެއްކޮށް ބޭއްވުމުން ރައްޔިތުންގެ ފައިސާއިން މަދުވެގެން 120 މިލިއަން ރުފިޔާ ސަލާމަތް ކުރެވޭނެ ކަމަށް ރައީސް ވަނީ ފާހަގަކުރައްވާފަ އެވެ.
އެމްޑީޕީން މި ވޯޓު ހުއްޓުވަން ކޯޓަށް ދާން ނިންމާފައިވީ ނަމަވެސް، އިލެކްޝަންސް ކޮމިޝަނުން މިހާރު އަންނަނީ އަންނަ އޭޕްރީލް މަހު ބާއްވާ ކައުންސިލް އިންތިހާބާ އެކު މި ވޯޓު ނެގުމަށް ވާންޖެހޭ ތައްޔާރީތައް ވަމުންނެވެ.
ދެ އިންތިހާބު އެއްކޮށްލުމުގެ ބިލު މަޖިލީހަށް ހުށަހެޅީއްސުރެ އެމްޑީޕީން އަންނަނީ އެކަމާ ދެކޮޅު ހަދަމުންނެވެ. ނަމަވެސް އެކި ފަހަރު ދައްކަނީ އެކި ބަހަނާތަކެެވެ. މި ފަދަ ބިލެއްގެ ސަބަަބުން ދިވެހި ޑިމޮކްރަސީ އަށާއި ދައުލަތަށް އަދި ރައްޔިތުންނަށްވެސް ކުރާނެ ފައިދާގެ ވާހަކަތައް ދެއްކުމުގެ ބަދަލުގައި ބިލުގެ އަސްލު މަގުސަދު އޮޅުވާލުމަށް އެމްޑީޕީން އަންނަނީ މަސައްކަތް ކުރަމުންނެވެ. އޭގެ އެންމެ ބޮޑު ހެއްކަކީ މި ބިލަށް ރައްޔިތުން ފެންނަ/ނުފެންނަ ގޮތަށް ވޯޓު ދިނުމުގެ ހައްގު ހުއްޓުވަން މަސައްކަތް ކުރަން ފެށުމެވެ.
