ދިވެހިންގެ މެދުގައި ރަމަޟާންމަހުގެ މަތިވެރިކަމާއި މާތްކަން ދަމަހައްޓަން މިއަދުގެ ހުތުބާގައި ގޮވާލައިފި އެވެ. މިއަދަކީ މި ބަރަކާތްތެރި ރަމަޟާން މަހުގެ ފުރަތަމަ ހުކުރު ދުވަހެވެ.
"ތަގުވާ އާއި ތައުބާގެ މައްސަރު" މި މައުޟޫއަށް މިއަދު އިއްވި ހުތުބާގައި މައިގަނޑު ގޮތެއްގައި އަލިއަޅުވާލާފައިވަނީ ރަމަޟާން މަހުގެ މާތްކަމާއި، މި މަހުގައި ހެޔޮ އަމަލުތައް ގިނަކުރުމުގެ މުހިންމުކަމުގެ މައްޗަށެވެ.
ހުތުބާގައި ބަޔާންކޮށްފައިވާ ގޮތުގައި، މައްސަރުތަކުގެ ތެރެއިން ރަމަޟާން މަހަކީ މާތް ﷲ އެތައް ގޮތަކުން މަތިވެރިކުރައްވާފައިވާ މަހެކެވެ. އެގޮތުން މި މަހުގައި ކީރިތި ޤުރްއާން ބާވައިލެއްވުމާއި، ރޯދައިގެ މަތިވެރި އަޅުކަން ފަރުޟުކުރެއްވުމުގެ އިތުރުން، މި މަހު ކުރާ ހެޔޮ އަމަލުތަކަށް ދެއްވާ ޖަޒާ އިތުރުކުރައްވާފައިވާކަން ހުތުބާގައި ފާހަގަކުރި އެވެ. އަދި މި މައްސަރަކީ ތައުބާވުމާއި ތަގުވާވެރިކަން އިތުރުކުރުމަށް ލިބޭ ރަން ފުރުސަތެއް ކަމަށްވެސް ބުނެފައިވެ އެވެ.
ތައުބާވުމާ ގުޅޭގޮތުން ހުތުބާގައި ބުނީ، އެއީ ތަގުވާވެރިކަމުގެ މަތީގައި ދެމިހުރުމަށް މަގުފަހިވާނޭ ކަމެއް ކަމަށެވެ. މީގެ އިތުރުން މީހެއްގެ ހައްގަކަށް އަރައިގަނެވިފައިވާނަމަ އެ ހައްގު އަދާކުރުމާއެކު ތައުބާވުމަށް ވަނީ ނަސޭހަތްތެރިވެފަ އެވެ.
"ތައުބާވުމަކީ ކޮންމެ މީހަކު ވެސް އެ މީހަކަށް ކުރެވިފައިވާ އެންމެހައި ފާފައިން އެއްކިބާވެ، އެ ކަންކަން ކުރެވުނު ކަމާ މެދު ދެރަވެ ހިތާމަކޮށް، އެ ކަމަށް އަރައިނުގަތުމަށް އަޒުމު ކަނޑައަޅައި ފާފަފުއްސެވުން އެދި އިހުލާސްތެރިކަމާއެކު މާތް اللهގެ ހަޟުރަތުގައި ދުއާ ދެންނެވުމެވެ،" ހުތުބާގައި ވެއެވެ.
ތަގުވާވެރިކަމަކީ ހިތާ ގުޅިފައިވާ ކަމެއްކަން ފާހަގަކޮށް، ހުތުބާގައި ބުނީ މާތް ﷲ އަބަދުމެ ބައްލަވައިވޮޑިގެންވާކަން ހިތުގައި ބާއްވަންޖެހޭނެ ކަމަށެވެ. ރޯދަ ފަރުޟުކުރެއްވުމުގެ ހިކުމަތަކީ ވެސް ތަގުވާވެރިވުން ކަމަށްވާއިރު، ރޯދައަށް ތިބޭއިރު މާތް ﷲގެ އަމުރުފުޅުތަކަށް ކިޔަމަންވެ، ނަހީކުރެއްވި ކަންކަމުން ދުރުހެލިވުމަށް ގަދައަޅައި މަސައްކަތްކުރުމަށް މިއަދުގެ ހުތުބާގައި ވަނީ ގޮވާލާފަ އެވެ.
ރަމަޟާން މަހުގެ ހުރުމަތް ހިފެހެއްޓުމުގެ މުހިންމުކަމުގެ މައްޗަށް އަލިއަޅުވާލަމުން ހުތުބާގައި ބުނީ، މީހުން ދިރިއުޅޭ ރަށްތަކުގައި ފަތުރުވެރިންނަށް ހިދުމަތްދޭ ފަރާތްތަކުން މިކަމަށް ހާއްސަ ސަމާލުކަމެއް ދޭންޖެހޭނެ ކަމަށެވެ. އެގޮތުން ހާމަކަން ބޮޑު ގޮތެއްގައި ދުވާލު ގަޑީގައި ރެސްޓޯރެންޓު ފަދަ ތަންތަން ހުޅުވައިގެން އާންމުންގެ ކުރިމަތީގައި ކެއިންބުއިމުގެ ހިދުމަތް ދިނުމަކީ ހުއްދަ ކަމެއް ނޫން ކަމަށާއި، އެފަދަ ހިދުމަތްތައް ދިނުމުގައި ހާއްސަ އިންތިޒާމުތަކެއް ހަމަޖައްސަންޖެހޭނެ ކަމަށް ބުންޏެވެ. އަދި ޝަރުއީ އުޒުރަކާ ހުރެ ރޯދަ ދޫކޮށްލާ މީހުންވެސް މަހުގެ ހުރުމަތް ދަމަހައްޓަންޖެހޭނެ ކަމަށް ހުތުބާގައި ބަޔާންކޮށްފައިވެ އެވެ.
