ވަގުތީގޮތުން ޕޮލިސް ކޮމިޝަނަރުގެ ޒިންމާތައް, ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއާ ހޯމް މިނިސްޓަރު އަލީ އިހުސާން މިއަދު ހަވާލުކުރައްވައިފި އެވެ.

ޕޮލިސް ކޮމިޝަނަރުގެ މަގާމު ހުސްވެފައިވަނީ, ކޮމިޝަނާ އޮފް ޕޮލިސް އިސްމާއީލް ނަވީން، 18 ފެބްރުއަރީ 2026އިން ފެށިގެން ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔާ ކުރެއްވުމާ ގުޅިގެންނެވެ.

30 މާޗު 1991ގައި ފުލުހުންގެ ހިދުމަތާ ހުޅިވަޑައިގެންނެވި ފަރުހާދު ފިކުރީ, ޑެޕިއުޓީ ކޮމިޝަނަރުގެ މަގާމަށް އައްޔަންކޮށްފައިވަނީ 16 ފެބުރުއަރީ 2024ގައެވެ.

ޑެޕިއުޓީ ކޮމިޝަނަރުގެ މަގާމަށް ފަރުހާދު އައްޔަންކުރެވުނު އިރު އޭނާ ހުންނެވީ ހެޑް އޮފް އޮޕަރޭޝަނަލް ސަޕޯޓް ކޮމާންޑް އަދި ޕީޕަލްސް ޑައިރެކްޓްރޭޓްގެ އެކްޓިން ހެޑްގެ މަގާމުގައެވެ.

އަދި އޭގެ ކުރިން ފޮލިހުގެ ތަފާތުގެ ދާއިރާތަކުގައި ފަރުހާދު ވަނީ މަސައްކަތް ކުރައްވާފައެވެ. އެގޮތުން, އޮޕަރޭޝަނަލް ދާއިރާ، ތަހުގީގީ ދާއިރާ، އެޑްމިނިސްޓްރޭޓިވް އެންޑް ސަޕޯޓް ދާއިރާ ހިމެނެއެވެ.

ގާނޫނުގައިވާ ގޮތުން ޕޮލިސް ކޮމިޝަނަރުކަމަށް ބޭފުޅަކު އައްޔަން ކުރެވޭނީ ހޯމް މިނިސްޓްރީން އެކަމަށް އާންމުކޮށް އިއުލާން ކުރުމަށް ފަހު, ކުރިމަތިލާ ފަރާތްތަކުގެ ފެންވަރު ޕޮލިސް ބޯޑުން ވަޒަންކޮށް ނުވަތަ އިންޓަވިއު ކުރުމަށް ފަހު އެވެ. އަދި އިންޓަވިއުއަށްފަހު ހޯމް މިނިސްޓަރަށް ހުށަހަޅާ ނަންތަކުގެ ތެރެއިން، މިނިސްޓަރުގެ ލަފާގެ މަތިން ޕޮލިސް ކޮމިޝަނަރު އައްޔަން ކުރައްވާނީ ރައީސުލްޖުމްހޫރިއްޔާ އެވެ.

ގާނޫނުގައިވާ ގޮތުން މި މަގާމު ހުސްވާތާ 45 ދުވަހުގެ ތެރޭގައި އެ މަގާމަށް އާ ބޭފުޅަކު އައްޔަން ކުރަން ޖެހެ އެވެ. މި މަގާމަށް ކުރިމަތިލެވޭނީ އެސިސްޓެންޓް ކޮމިޝަނާ އޮފް ޕޮލިސް ރޭންކުން ފެށިގެން މަތީގެ އޮފިސަރުންނަށް ކަމަށް ވެސް ގާނޫނުގައި ވެއެވެ.