އިސްރާއީލުން ހިފާފައިވާ ހުޅަނގު އައްސޭރީގެ ހެބްރޫންގެ ބައެއް ހިސާބުތަކުގައި ކާފިއު ތަންފީޒުކޮށް، އެތައް އަވަށެއް ރެއިޑްކޮށް، މީހުންތައް ހައްޔަރުކުރުމުގެ އޮޕަރޭޝަނެއް ހިންގައިފިއެވެ.

^{ހުޅަނގުއައްސޭރީގައި ރެއިޑްކޮށް ބައެއް މީހުން ކަނުބަނދެގެން ގެންދާ މަންޒަރު!}

އިސްރާއީލުގެ މީޑިއާ ރިޕޯޓްތައް ބުނާ ގޮތުން ޖަލީސް ސަރަހައްދުގެ ބައެއް ތަންތަން ބަންދުކޮށް، ޗެކްޕޮއިންޓްތައް ގާއިމްކޮށް، ޔަހޫދީ ސިފައިން ގެންދަނީ މީހުންތައް ޗެކުކުރަމުންނެވެ.

ބައެއް ހަބަރުތައް ބުނާ ގޮތުގައި ފަލަސްތީނުގެ ދިހަވަރަކަށް މީހުން ބަންދުކޮށްފައިވެއެވެ. ހައްޔަރުކުރާ މީހުން ކަނުބަނދެގެން ގެންގޮސް ވައްދަނީ އިސްރާއީލުގެ ޖަލަށް ކަމަށް އެ ކަންކަމާއި އަހުލުވެރި މަސްދަރަކުން ބުނެއެވެ.

ފަލަސްތީނުގެ މަސްދަރުތަކުން ވެސް ބުނެފައި ވަނީ ހެބްރޫން ސިޓީ، އިދްނާ، އަލްދަހިރިޔާ އަދި ބައިތު އުއްމާރު ފަދަ އެކިއެކި ސަރަހައްދުތަކުން މިރޭ 20 ވަރަކަށް މީހަކު ހައްޔަރުކޮށްފައިވާ ކަމަށެވެ.