ހުޅުމާލޭގައި ހިނގާ ނުރައްކާތެރި އެކްސިޑެންޓުތައް މަދުކުރުމަށް އަޅާ ފިޔަވަޅެއްގެ ގޮތުން، ހުޅުމާލެ ފޭސް 1 އާއި ފޭސް 2 ގެ ދޭތެރޭގައި އޮންނަ ކުރެދިމާ ހިނގުން އެއްކޮޅަށް ދުއްވާ މަގަކަށް ބަދަލުކޮށްފި އެވެ.
ކުރެދިމާ ހިނގުމަކީ ހުޅުމާލޭގެ ދެ ފިޔަވަހި ދޭތެރޭގައި އޮންނަ، ދުއްވާ އެއްޗެހި ގިނަ އަދި ދިގު މަގެކެވެ. މި މަގަކީ ފަހަކަށް އައިސް ގިނަ އަދަދެއްގެ އެކްސިޑެންޓުތައް ހިނގަމުންދާ ސަރަހައްދަކަށް ވާތީ، ޓްރެފިކް ފްލޯ އަށް ބަދަލު ގެނައުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ނިންމާފަ އެވެ. މި ބަދަލާއެކު މިހާރު އެ މަގުން ދަތުރުކުރެވޭނީ ވަކި އުސޫލެއްގެ މަތިން އެއް ފަރާތަކަށެވެ.
މަގުތަކުގެ ރައްކާތެރިކަން ކަށަވަރުކުރުމަށްޓަކައި މީގެ ކުރިންވެސް ތަފާތު ފިޔަވަޅުތަކެއް އަޅާފައިވެ އެވެ. އެގޮތުން، އެކްސިޑެންޓުތައް ގިނަވުމުގެ ސަބަބުން މިދިޔަ އަހަރުގެ ތެރޭގައި އެޗްޑީސީ އިން ވަނީ ހުޅުމާލޭގެ ބޮޑެތި މަގުތަކުގައި ކުދި ސްޕީޑް ބްރޭކަރުތަކެއް ހަރުކޮށްފަ އެވެ.
ނަމަވެސް، އެ ސްޕީޑް ބްރޭކަރުތަކުގެ ސަބަބުން ދުއްވާ މީހުންނަށް އުނދަގޫވާކަމަށް ބުނެ އާންމުންގެ ފާޑުކިޔުންތައް ވަރަށް ބޮޑަށް އަމާޒުވި އެވެ. އާންމުންގެ ޝަކުވާތަކާ ގުޅިގެން ފަހުން އެ ސްޕީޑް ބްރޭކަރުތައް ވަނީ މަގުތަކުން ނަގާފަ އެވެ.
ކުރެދިމާ ހިނގުމަށް މި ގެނެވުނު ބަދަލަކީ އެ ސަރަހައްދުގައި ހިނގާ އެކްސިޑެންޓުތައް މަދުކޮށް، މަގު ބޭނުންކުރާ ފަރާތްތަކަށް ރައްކާތެރި މާހައުލެއް ގާއިމުކުރުމަށް ކުރެވޭ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ.
