ކައްކާ ގޭސް ލިބުމުގައި ދާދިފަހުން ދިމާވި ދަތިތައް މުޅިން ހައްލުކޮށް، ކުރިއެކޭ އެއްގޮތަށް ހުރިހާ ސައިޒެއްގެ ކައްކާ ގޭސް ލިބޭނެ އިންތިޒާމު ހަމަޖައްސާފައިވާ ކަމަށް މޯލްޑިވް ގޭހުން ހާމަކޮށްފި އެވެ.
މޯލްޑިވް ގޭސްގެ މެނޭޖިން ޑިރެކްޓަރު އަބްދުﷲ މުހައްމަދު މީޑިއާއަށް މައުލޫމާތު ދެއްވަމުން ވިދާޅުވީ، ގޭހުގެ ސްޓޮކް މިހާރު އިޔާދަކުރެވިފައިވާ ކަމަށާއި، އިއްޔެއިން ފެށިގެން އެއްވެސް ދަތިކަމެއް ނެތި ކަސްޓަމަރުންނަށް ގޭސް ފޯރުކޮށްދެމުންދާނެ ކަމަށެވެ. މި ބަދަލާއެކު މާލެ އަދި އަތޮޅުތެރޭގެ ރަށްތަކަށްވެސް ގޭސް ފޯރުކޮށްދިނުމުގައި ހުރި ހުރަސްތައް ވަނީ ނައްތާލެވިފަ އެވެ.
ބަރަކާތްތެރި ރަމަޟާންމަހާ ގުޅޭގޮތުން ވާހަކަދައްކަވަމުން އެމްޑީ އަބްދުﷲ ވިދާޅުވީ، "ކުރިއަށް އޮތް ތަނުގައި އެއްވެސް ދަތިކަމެއް ނެތި ކައްކާ ގޭސް ލިބޭނެ، މި ރޯދަމަހުވެސް ކައްކާގޭސް އެއްވެސް ދަތިކަމެއް ނެތި ކުރިއެކޭ އެއްގޮތަށް ލިބޭނެ ކަމުގެ ފުރިހަމަ ޔަގީންކަން އެބައޮތް" ކަމަށެވެ.
އާންމުގޮތެއްގައި ރަމަޟާން މަހަކީ ކައްކާ ގޭހަށް އޮންނަ ޑިމާންޑު ބޮޑުތަނުން އިތުރުވާ މަހެކެވެ. އެހެންކަމުން، ރޯދަ މަހަށް ތައްޔާރުވުމުގެ ގޮތުން މެދުނުކެނޑި ގޭހާއި އެހެނިހެން އަސާސީ ކާބޯތަކެތި ރައްޔިތުންނަށް ފަސޭހަކަމާއެކު ލިބޭނެ އިންތިޒާމު ކަށަވަރުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
މޯލްޑިވް ގޭހުން އިތުރަށް ބުނީ، ގޭސް ހުސްނުވެ ފޯރުކޮށްދިނުމަށްޓަކައި ބޭނުންވާ ބަފާ ސްޓޮކްވެސް މިހާރު ހަމަޖެހިފައިވާ ކަމަށާއި، ކަސްޓަމަރުންނަށް ދިމާވެދާނެ ދަތިތަކަށް އަބަދުވެސް ސަމާލުކަންދީގެން މަސައްކަތް ކުރަމުންދާނެ ކަމަށެވެ.
