ރާއްޖޭގައި ފުޅާދާއިރާއެއްގައި ގޭހުގެ ހިދުމަތް ފޯރުކޮށްދެމުންދާ ސަރުކާރުގެ ކުންފުނި، މޯލްޑިވް ގޭހުން ލިކިއުޑް ނައިޓްރޯޖަން އުފައްދައި، ރާއްޖޭގެ ބާޒާރަށް ރަސްމީކޮށް ނެރެފި އެވެ. މިއީ ރާއްޖޭގެ ސިއްހީ ދާއިރާ އާއި ކާބޯތަކެތީގެ ސިނާއަތަށް ލިބިގެންދިޔަ ވަރަށް ބޮޑު ކުރިއެރުމެކެވެ.

ލިކިއުޑް ނައިޓްރޯޖަން އަކީ އާންމުކޮށް ސިއްހީ ދާއިރާގެ އިތުރުން ކާބޯތަކެތީގެ ސިނާއަތުގައި ތަފާތު ބޭނުންތަކަށް ބޭނުންކުރާ އެއްޗެކެވެ. މޯލްޑިވް ގޭހުން ހާމަކޮށްފައިވާ ގޮތުގައި، ރާއްޖޭގެ އެންމެ ބޮޑު ހޮސްޕިޓަލް ކަމަށްވާ އައިޖީއެމްއެޗަށް ބޭނުންވާ ލިކިއުޑް ނައިޓްރޯޖަން މިހާރު ސަޕްލައި ކުރަމުންދަނީ އެ ކުންފުނިންނެވެ. މީގެ އިތުރުން، ރާއްޖޭގެ ބައެއް ރިސޯޓްތަކަށް ވެސް މިހާރު ދަނީ މި ހިދުމަތް ފޯރުކޮށްދެމުންނެވެ.

ސިއްހީ ދާއިރާގައި ލިކިއުޑް ނައިޓްރޯޖަން ބޭނުންކުރާ މައިގަނޑު ބޭނުންތަކަށް ބަލާއިރު، ހަމުގެ ބަލިތަކަށް ފަރުވާ ކުރުމަށާއި، ސާމްޕަލްތައް ގަނޑުކޮށްފައި ބެހެއްޓުމަށް ބޭނުންކުރެ އެވެ. އެގޮތުން ތަހުލީލްތަކަށް ނަގާ ސާމްޕަލްތަކާއި، ރާއްޖެއިން ބޭރަށް ފޮނުވަންޖެހޭ ސާމްޕަލްތައް ރައްކާތެރިކަމާއެކު ގަނޑުކޮށްފައި ބެހެއްޓުމަށް މިއީ ކޮންމެހެން ބޭނުންތެރި އެއްޗެކެވެ. ރާއްޖޭގައި މިހާރު ގިނަ އަދަދެއްގެ ސްކިން ކްލިނިކްތައް ހިންގަމުންދާއިރު، މިއީ އެފަދަ ތަންތަނަށް ލިބިގެންދިޔަ ވަރަށް ބޮޑު ފަސޭހައެކެވެ.

ކާބޯތަކެތީގެ ސިނާއަތުގައި ލިކިއުޑް ނައިޓްރޯޖަން ބޭނުން ކުރަނީ ވަގުތުން ފިނިކުރަންޖެހޭ ޑެސާޓްތައް ތައްޔާރުކުރުމަށެވެ. ފައިން ޑައިނިން ރެސްޓޯރަންޓްތަކުގައި ލިކިއުޑް ނައިޓްރޯޖަން ބޭނުންކޮށްގެން ތަފާތު ކާނާ ތައްޔާރުކުރުން ވަނީ ވަރަށް ބޮޑަށް މަގުބޫލުވެފަ އެވެ. މީގެ އިތުރުން، ފިނިބުއިންތައް ކަސްޓަމަރުންނަށް ސާވްކުރުމުގައި ދުންއަރާފަދަ ހިތްގައިމު މަންޒަރުތައް އުފެއްދުމަށާއި، އަވަހަށް ގަނޑުކުރަންޖެހޭ ތަކެތި "ފްލޭޝް ފްރީޒް" ކުރުމަށްވެސް މިއީ މުހިންމު އެއްޗެކެވެ. މީގެ ސަބަބުން ކާނާގެ ތާޒާކަމާއި، ރަހައާއި، އަދި ހަށިގަނޑަށް ފައިދާހުރި މާއްދާތައް އެގޮތުގައި ހިފެހެއްޓުމަށް އެހީތެރިވެދެ އެވެ.

މޯލްޑިވް ގޭހުން ބުނި ގޮތުގައި، އެ ކުންފުނީގެ ހޮޓްލައިން ނަންބަރު 1616 އަށް ގުޅައިގެން ލިކިއުޑް ނައިޓްރޯޖަންއަށް އޯޑަރު ކުރެވޭނެ އެވެ. އަދި އޯޑަރު ކުރުމުން ޑެލިވަރީގެ ހިދުމަތްވެސް ކަސްޓަމަރުންނަށް ފޯރުކޮށްދޭނެ ކަމަށް އެ ކުންފުނިން މައުލޫމާތު ދެ އެވެ.