ހޭންޑީ ވޯޓާ ބްރޭންޑުގެ ބިއްލޫރި ފުޅީގެ ފެން ބޭނުން ނުކުރަން މޯލްޑިވްސް ފުޑް އެންޑް ޑްރަގް އޮތޯރިޓީ އިން އަންގައިފިއެވެ.
އެ އޮތޯރިޓީ އިން ނެރުނު ބަޔާނުގައި ބުނީ ހޭންޑީ ވޯޓާ ބޮޓްލިން ޕްލާންޓުން އުފައްދާ 'ހޭންޑީ' ބްރޭންޑުގެ ބިއްލޫރި ފެން ފުޅިތަކުން ބޯފެނުގައި ހުރެގެން ނުވާނެ ފަދަ ޖަރާސީމުގެ އަސަރު ފެނިފައިވާކަމަށެވެ. އަދި އެ ފެނަކީ ތަގައްޔަރުވެފައިވާ ފެނެއް ކަމަށް ވެސް އެ އޮތޯރިޓީ އިން ވަނީ ބުނެފައެވެ.
ޖަރާސީމު ފެނިފައިވަނީ އެ ބްރޭންޑުގެ 330 އެމްއެލް އާއި 500 އެމްއެލް އަދި (1) އެއްލީޓަރުގެ ބިއްލޫރި ފެން ފުޅިތަކުން ކަމަށް އެ ބަޔާނުގައި ވެއެވެ.
އެ އޮތޯރިޓީން ބުނީ މިފެންފުޅިތަކުގެ ތަހުލީލު ނަތީޖާ ދައްކާގޮތުން މި ފެނަކީ ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ)ގެ ބޯފެނުގެ މިންގަނޑަށް ފެތޭ ފެނެއް ނޫން ކަމަށެވެ.
އެމްއެފްޑީއޭއިން ވަނީ ވަކި ގޮތެއް އަންގަންދެން އެ ބްރޭންޑުގެ ބިއްލޫރި ފުޅިތަކުގައި ބަންދުކޮށްފައިވާ ފެން ބޭނުން ނުކުރުމަށް އިލްތިމާސްކޮށްފައެވެ.
