ތުއްތު ކުދިންނަށް ދޭ ފޯމިއުލާއަކުން ޖަރާސީމެއް ފެނުމާއި ގުޅިގެން އެ އުފެއްފުން ނުވިއްކުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސްކޮށްފި އެވެ.
މިކަމާ ގުޅިގެން އެމްއެފްޑީއޭ އިން ނެރުނު އިއުލާނެއްގައި ބުނެފައިވަނީ، މި ފޯމިއުލާ އަކީ އެމެރިކާގައި އުފައްދާފައިވާ އިންފެންޓް ފޯމިއުލާއެއް ކަމަށެވެ. މިއީ ބައި ހާޓް ހޯލް ނިއުޓްރިޝަން އިންފެންޓް ފޯމިއުލާ ކަމަށާއި، މި ފޯމިއުލާއިން ފެނިފައިވާ ޖަރާސީމަކީ 'ބޮޓުލިޒަމް' ކިޔާ ބައްޔެއް ފަތުރާ ޖަރާސީމެއް ކަމަށް އެމްއެފްޑީއޭ އިން ވަނީ ބުނެފަ އެވެ.
ޖަރާސީމު ފެނުމުގެ ސަބަބުން މި އުފެއްދުން ނުވިއްކައި އަދި ނައްތާލުމަށް ޔޫ.އެސް އެފް.ޑީ.އޭ އިން އަންގާފައިވާ ކަމުގެ މައުލޫމާތު ދުނިޔޭގެ ސިއްހަތު ޖަމިއްޔާގެ އިންޓަނޭޝަނަލް ފުޑް ސޭފްޓީ އޮތޯރިޓީސް ނެޓްވޯކް މެދުވެރިކޮށް އެމްއެފްޑީއޭ އަށް ހިއްސާކޮށްފައިވާ ކަމަށް އެމްއެފްޑީއޭ އިން ބުނެފައިވެ އެވެ.
މީގެ އިތުރުން އެމްއެފްޑީއޭ އިން ބުނީ، ރައްކާތެރިކަމުގެ ފިޔަވަޅު އެޅުމުގެ ގޮތުން މިއަދުން ފެށިގެން މި އުފެއްދުން ރާއްޖެއަށް އެތެރެކުރުމާއި ވިއްކުމަކީ މަނާކަމެއް ކަމަށެވެ. އަދި މިކަމާއި ގުޅޭ އިތުރު މައުލޫމާތު ސާފުކުރައްވަން ބޭނުންފުޅުވާ ފަރާތްތަކުން އެ އޮތޯރިޓީގެ ނަމްބަރު 3034213 އަށް ނުވަތަ 7603204 އަށް ގުޅުއްވާ މައުލޫމާތު ހޯއްދެވުމަށް ވަނީ އެދިފަ އެވެ.
